Qazaqstanda otbasylardyń ál-aýqatyn baǵalaý ádistemesi engiziledi – Oljas Bektenov
ASTANA.KAZINFORM – QR Premer-mınıstri Oljas Bektenov áleýmettik qoldaý kórsetý kezinde otbasylardyń naqty jaǵdaıyn barynsha eskerý úshin memlekettik organdar men ekinshi deńgeıli bankterdiń tsıfrlyq júıelerin 1 jeltoqsanǵa deıin biriktirýdi tapsyrdy.
Oljas Bektenovtiń aıtýynsha, áleýmettik saıasattyń basty basymdyqtary azamattardyń ómir súrý sapasy men ál-aýqatyn arttyrý, adamı kapıtaldy damytý jáne óskeleń urpaqtyń jan-jaqty damýyna jaǵdaı jasaý bolýǵa tıis.
– Memleket basshysynyń tapsyrmasyna sáıkes, memlekettik qoldaý sharalaryn pılottyq rejımde kezeń-kezeńimen iske asyrý qajet. Eńbek mınıstrligi pılottyq jobany jáne Otbasynyń ál-aýqatyn baǵalaý ádistemesin engizý jónindegi normatıvtik quqyqtyq aktilerdiń jedel qabyldanýyn qamtamasyz etsin, – dep tapsyrdy Premer-mınıstr.
Sondaı-aq barlyq deńgeıdegi ákimderge áleýmettik saıasattyń jańa tásilderin engizý boıynsha halyq arasynda júıeli aqparattyq-túsindirý jumystaryn jalǵastyrý mindetteldi.
Budan bólek, Eńbek, Ulttyq ekonomıka jáne Qarjy mınıstrlikterine 2027 jylǵy 1 qańtardan bastap aılyq eń tómengi jalaqy mólsherin 110 myń teńgege deıin arttyrýdy qamtamasyz etý tapsyryldy.
Aıta keteıik, Oljas Bektenov óńirlerdiń ınfraqurylymdyq jobalaryn jyl sońyna deıin anyqtaýdy tapsyrdy.
