Qazaqstanda otbasylardyń ál-aýqaty qalaı baǵalanady
ASTANA. KAZINFORM – Qazaqstanda Otbasynyń tsıfrlyq kartasy arqyly 6,2 mln otbasynyń áleýmettik-ekonomıkalyq jaǵdaıy baǵalanyp otyr. Júıe áleýmettik qoldaýǵa muqtaj azamattardy anyqtaý úshin tabys pen múlikten bólek, otbasy quramyn jáne turmys jaǵdaıyn da eskeredi, dep habarlaıdy Eńbek jáne halyqty áleýmettik qorǵaý mınıstrligi.
2023 jyldan beri jumys isteıtin Otbasynyń tsıfrlyq kartasy búginde shamamen 20,4 mln adamdy qamtıdy. Ol 30 tsıfrlyq júıedegi málimetterdi paıdalanyp, qajetti aqparatty avtomatty túrde jınaqtaıdy.
Mınıstrlik málimetinshe, otbasylardyń jaǵdaıy eki negizgi baǵyt boıynsha baǵalanady. Olar – materıaldyq ál-aýqat jáne ómirlik jaǵdaılar.
Materıaldyq ál-aýqatty anyqtaý kezinde turǵyn úı, avtokólik, jer ýchaskesi, kommertsııalyq jyljymaıtyn múlik, kásipkerlik qyzmetke qatysý jáne kredıttik júkteme eskeriledi.
Bul rette múliktiń bolýy ǵana emes, onyń sıpattamalary da mańyzdy. Máselen, páteri, avtokóligi nemese shaǵyn jer ýchaskesi bar otbasy mindetti túrde aýqatty sanatqa jatqyzylmaıdy.
– Sonymen qatar júıe otbasy músheleriniń jasyn, balalary, múgedektigi bar jáne sozylmaly aýrýlary bar adamdardyń bolýyn, sondaı-aq otbasynyń áleýmettik jaǵdaıyna áser etýi múmkin ózge de ómirlik mán-jaılardy eskeredi. Mysaly, eki otbasynyń tabysy birdeı bolǵanymen, olardyń turmys jaǵdaıy ártúrli bolýy múmkin. Bir otbasynda ata-ananyń ekeýi de jumys istese, ekinshisinde barlyq otbasy múshesin asyraıtyn tek bir adam. Onyń ústine otbasynda kishkentaı balalar nemese qosymsha kútim men shyǵyndy qajet etetin múgedektigi bar adamdardyń bolýy da qarastyrylady, – delingen mınıstrlik aqparatynda.
Jınaqtalǵan derekter negizinde ár otbasynyń ál-aýqat deńgeıi bes sanattyń birine jatqyzylady: joǵary, aýqatty, qanaǵattanarlyq, ekonomıkalyq osal nemese ekonomıkalyq jáne áleýmettik osal.
Otbasynyń jaǵdaıy tsıfrlyq júıelerden kelip túsetin jańartylǵan málimetter negizinde turaqty túrde qaıta baǵalanady.
Mınıstrliktiń túsindirýinshe, Otbasynyń tsıfrlyq kartasynyń basty maqsaty – ár otbasynyń naqty áleýmettik-ekonomıkalyq jaǵdaıyn anyqtap, ómirlik mán-jaılaryn eskere otyryp, qajetti memlekettik qoldaýdy usyný.
Aıta keteıik, buǵan deıin Otbasynyń tsıfrlyq kartasyndaǵy málimetter qate kórsetilgen jaǵdaıda azamattardyń turǵylyqty jeri boıynsha tıisti memlekettik organdarǵa júgine alatyny habarlanǵan bolatyn. Derekter túzetilgennen keıin otbasynyń ál-aýqat sanaty kelesi baǵalaý kezinde qaıta esepteledi.
