Qazaqstanda Otbasy máseleleri jónindegi ýákil ınstıtýty qurylady

ASTANA. KAZINFORM — Memleket basshysy «Qazaqstan Respýblıkasy Prezıdentiniń janyndaǵy Otbasy máseleleri jónindegi ýákil ınstıtýtyn qurý týraly» Jarlyqqa qol qoıdy, dep habarlaıdy Aqordanyń baspasóz qyzmeti.

— Qazaqstan Respýblıkasynda adam quqyqtaryn qorǵaýdy kúsheıtý, otbasy ınstıtýtyn nyǵaıtý jáne memlekettik otbasylyq saıasatty jetildirý maqsatynda Qazaqstan Respýblıkasy Prezıdentiniń janyndaǵy Otbasy máseleleri jónindegi ýákil ınstıtýtyn (budan ári — Ýákil) qurýdy qaýly etemin, ol óz qyzmetin Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa quramynda tóraǵanyń orynbasary retinde qoǵamdyq negizde júzege asyrady. Ýákildiń negizgi maqsattary otbasy quqyqtary men múddelerin qorǵaýdy kúsheıtý, otbasy ınstıtýtyn jáne dástúrli otbasylyq qundylyqtardy nyǵaıtý, memlekettik otbasylyq jáne demografııalyq saıasatty jetildirý, otbasylyq-turmystyq zorlyq-zombylyqtyń aldyn alý, sondaı-aq qazaqstandyq otbasylardyń ál-aýqatyna járdemdesý bolyp belgilensin, — delingen qujatta.

Qazaqstan Respýblıkasynyń Úkimetine osy Jarlyqtan týyndaıtyn sharalardy qabyldaý tapsyryldy. Al osy Jarlyqtyń oryndalýyn Qazaqstan Respýblıkasy Prezıdentiniń Ákimshiligi baqylaıdy. Jarlyq qol qoıylǵan kúninen bastap qoldanysqa engiziledi.

Budan buryn Prezıdent Qazaqstan men Aýstrııa arasynda zańsyz júrgen adamdarǵa qatysty qujatqa qol qoıǵanyn jazdyq.