Qazaqstanda otandyq taýarlar arasynda «Halyq markasy» jalpyulttyq baıqaýy jarııalandy
ASTANA. QazAqparat - Qazaqstanda otandyq taýarlar arasynda «Halyq markasy» jalpyulttyq baıqaýy jarııalandy. Eń úzdik taýaróndirýshiler men otandyq markalar onlaın daýys berý arqyly anyqtalady.
«Halyq markasy» belgisin jeńip alǵan otandyq taýaróndirýshiler Mılanda «EKSPO-2015» kórmesinde Qazaqstan pavılonynda el atynan qatysatyn bolady.
«Bıyl jyl basynda Memleket basshysynyń bastamasymen «Qazaqstanda jasalǵan» atty shara bastaldy. Atalmysh bastamany qoldaý maqsatynda Qazaqstanda otandyq taýarlar arasynda «Halyq markasy» jalpyulttyq baıqaýy jarııalandy. Onyń eń basty maqsaty otandyq taýarlardyń tanymaldylyǵy men sapasyn arttyrý.
Jeńimpazdar 30 atalym boıynsha anyqtalady. Olardyń ishinde «Gazdalǵan sýsyn», «Sháı», «Kondıterlik taǵamdar», «Un», «Sút ónimderi» syndy bólimder bar.
Jeńimpazdar óz taýarlarynyń syrtyna «Halyq markasy» belgisin qoıý múmkindigine ıe bolady. Bul onyń eldegi eń sapaly taýar ekendigin bildiredi.
Halyqtyq daýys berý naýqany 25 tamyzda bastalady jáne qyrkúıek aıyna deıin jalǵaspaq. Jeńimpazdardy marapattaý sharasy Mılan kórmesiniń Qazaqstan pavılonynda 16 qazanda - Dúnıejúzilik azyq-túlik kúninde ótedi.
«Bul onlaın baıqaý túrindegi múldem jańa joba. Eń úzdik 30 taýar halyqtyń tańdaýymen anyqtalatyn bolady. Statıstıkalyq málimetter boıynsha, Qazaqstanda 2 myńǵa jýyq azyq-túlik taýarlaryn óndiretin kásiporyn bar eken. Olar DSU jáne EAEO aıasynda óz básekelestikterin arttyrýlary shart. Biz barlyq taýaróndirýshilerdi belsendi qatysýǵa jáne barsha qazaqstandyqtardy daýys berýge shaqyramyz», - deıdi QR Parlamenti Májilisiniń depýtaty Aıgúl Soloveva Ortalyq kommýnıkatsııalar qyzmetinde ótken baspasóz máslıhatynda.
