Qazaqstanda otandyq qanttyń úlesi nebári 3 paıyzǵa teń

ASTANA. QazAqparat - Qazaqstanda otandyq qant qyzylshasynan shyqqan qanttyń jalpy úlesi nebári 3 paıyzdy quraıdy, qalǵan 97 paıyz - ımport. Bul týraly búgin Aýyl sharýashylyǵy vıtse-mınıstri Qaırat Aıtýǵanov málim etti.

«Onyń ústine bul kólemniń negizgi bóligi - 55 paıyzy ımporttalatyn qant quraǵynan jasalady. Qant quraǵyn biz Brazılııa jáne Kýba elderinen satyp alamyz. Daıyn qanttyń tikeleı ımporty 42 paıyzdy quraıdy. Ol Belarýs, Moldova, Polsha, Ýkraına, Brazılııa memleketterinen jetkiziledi», - dedi Q.Aıtýǵanov mınıstrlikte ótken baspasóz máslıhatynda.

Eske sala keteıik, ımporttalatyn qantqa úlken táýeldilik bolǵandyqtan, qant baǵasy sharyqtap ketti. QR Ulttyq ekonomıka mınıstrliginiń málimeti boıynsha, baǵa 10 paıyzǵa joǵarylaǵan. Biraq keıbir dúkenderde onyń baǵasy 2 esege deıin aspandap ketken bolatyn. Bul qant shıkizatynyń tonnasyna 354 dollardan 477 dollarǵa deıin kóterilýinen oryn aldy.

Sonymen qatar Q.Aıtýǵanov Qazaqstanda óndiristik qýat tolyq qoldanylmaı otyrǵandyǵyn atap ótti. Áleýettiń tek 37 paıyzy qoldanylyp otyr.

Degenmen sońǵy jyldary qant qyzylshasynyń egistik alqaptary edáýir ulǵaıǵan. 2014 jyly Almaty jáne Jambyl oblystarynda qant qyzylshasynyń alqaptary 1,2 myń gektardy qurasa, bıyl egistik 12,9 myń gektardy quraǵan.

Alǵash ret Soltústik Qazaqstanda qant qyzylshasy ósirile bastady. Shal aqyn aýdanynda 400 gektar alqapqa qant qyzylshasy egilgen. Ónimdi jınaý bastaldy, gektaryna 50-55 tonna qanttylyǵy 15-17 paıyzdy quraıtyn qant qyzylshasy jınalady dep boljanýda.

«2015 jyldan beri qant qyzylshasyn satyp alýǵa ketken shyǵyn memleketpen sýbsıdııalanady. Búginde qant zaýyttary qyzylshany kelisine 14 teńgeden satyp alady, onyń 6 teńgesin memleket sýbsıdııalaıdy», - dedi vıtse-mınıstr.