Qazaqstanda otandyq ǵalym ázirlegen biregeı gıdrogeldi qoldaný arqyly ota jasaldy
Bul ádisteme Qazaqstan Respýblıkasy Bilim jáne ǵylym mınıstrliginiń 2021-2022 jyldarǵa arnalǵan ǵylymdy baǵdarlamalyq-nysanaly qarjylandyrý baǵdarlamasy aıasynda ázirlendi, dep habarlaıdy QazAqparat mınıstrliktiń baspasóz qyzmetine silteme jasap.
«Bul Memleket basshysynyń medıtsınalyq-bıologııalyq zertteýlerdiń basymdyǵy jáne eldiń damýyna ǵylymnyń úlesin arttyrý týraly tapsyrmalaryn iske asyrýdyń alǵashqy praktıkalyq nátıjeleriniń biri. Ǵylymdy qarjylandyrýdyń eki esedeı artýy arqasynda qazaqstandyqtardyń ómir súrý sapasyn jaqsartýǵa baǵyttalǵan kóptegen ǵylymı ıdeıa men ázirlemeni qoldaý múmkindigi artty. Qazaqstandyq ǵalymdar QazVac vaktsınasyn jasap shyǵardy, Aıthojın atyndaǵy Molekýlıarlyq bıologııa jáne bıohımııa ınstıtýty qant dıabetin emdeýge arnalǵan jobany engizip jatyr. Búgin bastalǵan býyndardy qalpyna keltirýge arnalǵan gıdrogeldiń klınıkalyq zertteýleri Ulttyq bıotehnologııa ortalyǵy N.Batpenov atyndaǵy Travmatologııa jáne ortopedııa ulttyq ǵylymı ortalyǵymen birlesip júzege asyratyn ǵylymı baǵdarlamanyń bir bóligi. Bul qazirgi tańda BǴM qarjylandyratyn 59 ǵylymı-tehnıkalyq baǵdarlamanyń biri ekenin de aıta ketken jón. Onyń barlyǵy naqty ómirlik máselelerdi sheshýge baǵyttalǵan», - dep atap ótti QR BǴM Ǵylym komıtetiniń tóraıymy Janna Qurmanǵalıeva.
Jańa ádistemeniń negizgi ázirleýshisi – Ulttyq bıotehnologııa ortalyǵynyń diń jasýshalary zerthanasynyń meńgerýshisi Vıacheslav Ogaı.
«Modıfıkatsııalanǵan fıbrın gıdrogelinen, patsıenttiń óz diń jasýshalarynan turýy gıdrogeldiń biregeıligi bolyp esepteledi. Osynyń arqasynda zaqymdalǵan shemirshekti qalpyna keltirý kúsheıip, jedeldetiledi. Jańa tehnıka patsıentterdiń ómir súrý sapasyna jaqsy áser etip, múgedektikti azaıtady dep josparlanyp otyr. Nátıjesinde tize býynyn endoprotezdeýge muqtaj adamdar sany azaıady», – dep aıtty Vıacheslav Ogaı.
Dárigerler oń jaq tize býynynyń artrozy bar 28 jastaǵy naýqasqa ota jasady. Klınıkalyq synaqtarǵa barlyǵy 25 pen 60 jas aralyǵyndaǵy 80 erikti qatysady, onyń ishinde býyndarynda jasyna baılanysty ózgeristeri bar egde jastaǵy adamdar, sondaı-aq kásibı jaraqat alǵan jas sportshylar bar. Klınıkalyq zertteýler halyqaralyq klınıkalyq zertteýler standartyna (GCP) sáıkes júrgiziledi. Patsıentterdiń quqyqtaryn, qaýipsizdigin jáne ál-aýqatyn qorǵaýdy qamtamasyz etý maqsatynda patsıentterdiń jeke derekteri jarııa etilmeıdi.
Osyǵan deıin otandyq ǵalymnyń kúrdeli synyqtardy emdeıtin gıdrogel oılap tapqanyn jazǵan bolatynbyz.
