Qazaqstanda otandyq elektrondy ónerkásip shyǵarýshylardyń tizimin jasaý usynylyp otyr
ASTANA. QazAqparat - QR qorǵanys jáne aeroǵarysh ónerkásibi mınıstrliginiń bastamasymen Ulttyq ǵarysh ortalyǵynda Májilis parlamenti depýtattarynyń, memlekettik mekemeler, «Atameken» UQP jáne basqa da kásiporyn ókilderiniń qatysýymen elimizdegi aqparattyq qaýipsizdikti qamtamasyz etý jáne elektrondyq ónerkásipti damytý máseleleri talqylandy, dep habarlaıdy «QazAqparat» HAA tilshisi.
QR Qorǵanys jáne aeroǵarysh ónerkásibi mınıstri Beıbit Atamqulov talqylanyp otyrǵan máselelerdiń ózektiligine nazar aýdardy. «Mınıstrliktiń aldynda turǵan bul máselege Elbasymyzdyń ózi elimizdiń damýy jolyndaǵy aýqymdy is dep basymdylyq berdi. Bul jedeldetilgen tehnologııalyq ekonomıkany jańǵyrtý jáne negizgi salalardyń biri - ónerkásipke ımpýls berý arqyly keleshekte shıkizattyq emes eksporttyń kólemin 2025 jylǵa deıin eki esege ulǵaıtý qajettiligi», - dep atap ótti mınıstr.
QR Qorǵanys jáne aeroǵarysh ónerkásibi mınıstrligi baspasóz qyzmetiniń habarlaýynsha, vıtse-mınıstr keńeske qatysýshylardy Qazaqstan Respýblıkasyndaǵy elektrondy ónerkásiptiń qazirgi jaı-kúıimen tanystyryp, salanyń elimizdegi qalyptasý joly men álemdegi damý baǵyttaryn baıandaǵan.
Depýtattar jáne mınıstrlik ókilderi elektrondy ónerkásipti damytýdy elimizdegi mashına jasaý salasyndaǵy ǵylymdy qajetsinetin salalardyń biri retinde qarastyrýdyń mańyzdylyǵyn atap ótti. «Atameken» UKP kásipkerleri memleket jáne bıznes ortasy arasyndaǵy dıalogtyq alańnyń mundaı túri otandyq óndirýshilermen yntymaqtastyqty nyǵaıta túsetindigin jetkizdi. 
