Qazaqstanda otandyq taýar óndirýshilerge arnalǵan jańa qoldaý sharalary iske qosyldy
ASTANA. KAZINFORM — Úkimet otandyq bıznesti qoldaý sharalaryn keńeıtedi. Bızneske qarjylyq júktemeni azaıtý úshin qosymsha sharalar engizildi. Bul týraly QR Premer-mınıstriniń baspasóz qyzmeti habarlady.
Prezıdenttiń otandyq taýar óndirýshilerdi (OTÓ) qoldaý jónindegi tapsyrmalaryn oryndaý Úkimettiń basym baǵyty bolyp qala beredi. Osy jumystar sheńberinde basym tártippen satyp alý tizbesin keńeıtý jóninde sharalar qabyldanady jáne qazaqstandyq ónimge suranysty yntalandyrýdyń jańa tetikteri engizilip jatyr.
Sońǵy jyldary memlekettik organdar basym tártippen satyp alatyn taýarlardyń tizbesi 2,7 esege ulǵaıdy, búginde ol 4,8 myńnan astam ataýdy qamtıdy. Bul turaqty suranysty qamtamasyz etedi jáne otandyq kompanııalardyń óndiristik qýatyn arttyrýǵa yqpal etedi.
— Bızneske qarjylyq júktemeni azaıtý úshin qosymsha sharalar engizildi. Memlekettik kelisimsharttar jasasý kezinde óndirýshilerge 30% mólsherinde mindetti avans beriledi, sharttyń oryndalýyn qamtamasyz etý talaby joıyldy, turaqsyzdyq aıybynyń stavkasy 10%-dan 3%-ǵa deıin tómendetiledi. Osynyń arqasynda jasalǵan sharttardyń kólemi osy jyldyń basynan beri 418 mlrd teńgeden asty, bul ótken jylmen salystyrǵanda 51,4%-ǵa artyq, — delingen habarlamada.
Otandyq kásiporyndardan ónimdi satyp alýǵa kepildik beretin ofteık-kelisimsharttar aıtarlyqtaı nátıje berip keledi. 2024 jyly olardyń kólemi 250 mlrd teńgeden assa, 2025 jyldyń 10 aıynda 1 trln 064 mlrd teńgege jetti. Buǵan qosymsha jobalardy júzege asyrýdy jedeldetýge jáne ákimshilik kedergilerdi qysqartýǵa múmkindik beretin memlekettik tapsyrys berýshilermen tikeleı sharttar jasasý tetigi de jumys istep tur.
Jyl basynan beri barlyǵy 2,3 trln teńge somasyna 1,5 myńǵa jýyq uzaq merzimdi sharttar men ofteıkter jasaldy. Bul sharalar ımportqa táýeldilikti tómendetýge jáne ulttyq óndirýshilerdiń pozıtsııalaryn nyǵaıtýǵa yqpal etedi.
Qosymsha qoldaý sharalary jańa normatıvtik sheshimderde de bekitildi.
— Máselen, 2025 jylǵy 1 shildeden bastap jer qoınaýyn paıdalanýshylar bırjadaǵy standartqa keltirilmegen taýarlardy satyp alýdan shyǵarylyp tastaldy. Bul sheshim 450 mlrd teńgeden astam qarajatty retteletin satyp alýlarǵa baǵyttaýǵa jáne otandyq kompanııalardyń osy kelisimsharttarǵa qoljetimdiligin keńeıtýge múmkindik berdi. 9 aıdyń qorytyndysy boıynsha retteletin satyp alýlardaǵy elishilik qundylyq úlesi 54,4%-dy qurady, — delingen habarlamada.
Buǵan deıin, 19 mamyrda jer qoınaýyn paıdalanýshylar, kvazımemlekettik sektor, tabıǵı monopolııalar men júıe quraýshy kásiporyndar syndy iri tapsyrys berýshilerdiń otandyq óndirýshilermen uzaq merzimdi sharttar men offteık-kelisimsharttar jasasý mindettemelerin kózdeıtin zańǵa qol qoıylǵan bolatyn. Sondaı-aq naqty nysanaly kórsetkishteri bar elishilik qundylyqty damytý baǵdarlamasy bekitilip jatyr.
Sonymen qatar jańa jyldan bastap Qazaqstandyq taýar óndirýshilerdiń biryńǵaı tizilimi jumys isteı bastaıdy, ol taýarlardyń shyǵý tegin rastaýdyń ashyq tetigin qamtamasyz etedi.
Osylaısha, qabyldanyp jatqan sharalar satyp alýdaǵy qazaqstandyq qamtý úlesiniń odan ári ósýi úshin jaǵdaı týǵyzýǵa múmkindik beredi jáne otandyq óndirýshiler úshin turaqty jáne boljamdy ótkizý naryǵyn qalyptastyrady.
Osyǵan deıin Qazaqstanda ındýstrııalyq ınvestıtsııalar kúsheıip, ondaǵan myń jumys orny qurylatynyn jazǵan edik.