Qazaqstanda otandyq qus etiniń úlesi 78%-ǵa deıin artty
ASTANA. KAZINFORM — Eldiń qus etimen qamtylýy bes jylda 58%-dan 78%-ǵa ósti, dep habarlaıdy Aýyl sharýashylyǵy mınıstrliginiń baspasóz qyzmeti.
Qazaqstanda qus etin óndirý turaqty túrde artyp, ishki naryqtyń ımportqa táýeldiligi tómendep keledi. Sońǵy bes jylda otandyq qus eti óndirisi 58%-ǵa ulǵaıyp, ishki naryqtaǵy otandyq ónimniń úlesi 58%-dan 78%-ǵa deıin artty.
Qus sharýashylyǵyn damytý agroónerkásiptik keshen salasyndaǵy memlekettik saıasattyń basym baǵyttarynyń biri bolyp qala beredi. Memlekettik qoldaý sharalary kásiporyndarǵa óndiristik qýattaryn arttyrýǵa, qoldanystaǵy nysandardy jańǵyrtýǵa jáne jańa ınvestıtsııalyq jobalardy iske asyrýǵa múmkindik berip otyr.
2025 jyldyń qorytyndysy boıynsha Qazaqstanda 371,7 myń tonna qus eti óndirildi. Bul 2020 jylǵy kórsetkishten 58%-ǵa joǵary. 2020 jyly qus etiniń óndirisi 235,3 myń tonnany quraǵan.
— Óndiris kóleminiń artýy ishki naryqty otandyq ónimmen qamtamasyz etý deńgeıine de áser etti. Bes jyl ishinde ishki tutynýdaǵy otandyq qus etiniń úlesi 58%-dan 78%-ǵa deıin artty. Saladaǵy ósim bıyl da jalǵasyp keledi. 2025 jyly qus etin óndirý kólemi 372,5 myń tonnany qurap, 2024 jylmen salystyrǵanda 3,5%-ǵa ósti. 2024 jyly 360 myń tonna qus eti óndirilgen, — delingen mınıstrlik taratqan habarlamada.
2026 jyldyń alǵashqy alty aıynda 192,4 myń tonna qus eti óndirildi. Qazir elimizde jumyrtqa baǵytyndaǵy 37 ónerkásiptik qus fabrıkasy jumys isteıdi. Olardyń jalpy óndiristik qýaty jylyna 4,5 mlrd jumyrtqa óndirýge múmkindik beredi.
Et baǵytynda 32 kásiporyn jumys isteıdi. Olardyń jıyntyq óndiristik qýaty jylyna 505 myń tonna qus etin óndirýge jetedi.
Sońǵy jyldary salada jańa óndirister ashýǵa jáne qoldanystaǵy kásiporyndardyń qýatyn keńeıtýge baǵyttalǵan birqatar ınvestıtsııalyq joba iske asyryldy. Olardyń qatarynda «Prıma Kýs», «Naýryz Agro KZ», «Turkey PVL» jáne «Alel Agro» kásiporyndary bar.
Memlekettik qoldaý sharalary kásiporyndarǵa óndiris kólemin ulǵaıtyp qana qoımaı, zamanaýı óndiristik ınfraqurylymdy qalyptastyryp, salanyń odan ári damýyna qajetti jaǵdaı jasaýǵa múmkindik beredi.
Salanyń óndiristik áleýetin odan ári arttyrý jumystary jalǵasyp jatyr. Aldaǵy ýaqytta jylyna 220 myń tonna qus etin óndiretin jańa óndiristik qýattardy iske qosý josparlanyp otyr.
Negizgi jobalardyń qatarynda Almaty oblysynda «Aitas» AQ-nyń jáne Jambyl oblysynda «Alel Agro» AQ-nyń óndiristik keshenderin salý jáne keńeıtý jobalary bar. Olardyń jıyntyq óndiristik qýaty jylyna shamamen 170 myń tonnany quraıdy.
Bul jobalardyń iske asyrylýy Qazaqstannyń ishki naryǵyn otandyq qus etimen tolyq qamtamasyz etýge, ımportqa táýeldilikti edáýir azaıtýǵa jáne eksporttyq áleýetti arttyrýǵa múmkindik beredi.
Budan buryn Qazaqstanda qus eti óndirisin 2030 jylǵa deıin tolyq qamtamasyz etý mindeti qoıylǵanyn jazdyq.
