Qazaqstanda «Otandastar» qory jumysyn bastady

  ASTANA. QazAqparat - Prezıdenttiń sheteldegi qazaqtardy qoldaý boıynsha berilgen tapsyrmalary negizinde Dúnıejúzi qazaqtarynyń qaýymdastyǵy janynan «Otandastar» qory quryldy, dep habarlaıdy QazAqparat.

«Qor sheteldegi jáne Qazaqstan Respýblıkasyna kóship kelgen etnıkalyq qazaqtardy qoldaý maqsatynda qurylǵan. Ol Dúnıejúzi qazaqtary qaýymdastyǵymen tyǵyz yntymaqtastyqta jumys isteıtin bolady», - dep habarlady qaýymdastyqtyń baspasóz qyzmetinen. 

Dúnıejúzi qazaqtarynyń besinshi quryltaıynda Prezıdent Nursultan Nazarbaev shetelde turyp jatqan otandastarymyzǵa qoldaý bildirý qajettigin  atap ótken bolatyn. Elbasynyń osy tapsyrmasy boıynsha «Otandastar» qory jumysyn bastady. Onyń  negizgi mindetteri - sheteldegi jáne elimizge oralǵan qandastarymyzǵa mádenı, bilim berý jáne quqyqtyq salalarda qoldaý kórsetý.

«Otandastar» qory aktsıonerleriniń jınalysy barysynda Dúnıejúzi qazaqtarynyń qaýymdastyǵy tóraǵasynyń birinshi orynbasary Zaýytbek Turysbekov qordyń Dırektorlar keńesiniń tóraǵasy bolyp saılandy. Al qor prezıdenti saıası jáne qoǵam qaıratkeri Nurtaı Ábiqaev boldy.