Qazaqstanda ósirilgen banan nege dúken sórelerine shyqpaı jatyr — AShM jaýaby
ASTANA. KAZINFORM — Aýyl sharýashylyǵy mınıstrligi Eginshilik departamentiniń dırektory Nazgúl Hatepova ortalyq kommýnıkatsııalar qyzmetinde ótken baspasóz máslıhatynda qazaqstandyq banan nege dúken sórelerine shyqpaı jatqanyn túsindirdi.
— Shynymen de keıingi birneshe jylda elimizde ekzotıkalyq jemister ósirile bastady. Onyń ishinde siz ataǵan banan, lımon sııaqty ónimder de bar. Qazir bul jemister Túrkistan oblysynda ósiriledi. Arnaıy jylyjaı bar onda. Jylyna 1000 tonnaǵa deıin banan beredi. Árıne, bul búkil respýblıkanyń qajettiligin jaba almaıdy. Degenmen, óndiris kólemin ulǵaıtýǵa barlyq jaǵdaı jasalyp otyr, — dedi ol jýrnalıst saýalyna bergen jaýabynda.
Departament basshysy mundaı jobalar Qazaqstandy ekzotıkalyq jemispen tolyqtaı qamtamasyz ete almaıtynyn atap ótti.
— Klımatqa baılanysty ishki naryqty bul jemistermen tolyq qamtamasyz etý óte qıyn. Biraq ımportty ishinara bolsa da almastyrý ábden múmkin sharýa. Óıtkeni zamanaýı tehnologııalar ondaı múmkindik berip otyr. Osyǵan baılanysty jobalar bar. Qoldaý bar. Kólemin arttyrýdy kózdeıtin josparymyz da bar, — dedi Nazgúl Hatepova.
Buǵan deıin Túrkistan jylyjaıynda banan ekinshi ret jemis bergenin jazǵan edik.
