Qazaqstanda ósimdik maıy óndirisi artty: ósim 57%-ǵa jetti

ASTANA. KAZINFORM — Qazaqstanda ósimdik maıyn óndirý kólemi jańa marketıngtik maýsymnyń alǵashqy eki aıynda 39%-ǵa ósip, 141 myń tonnadan asty. Ásirese kúnbaǵys maıy óndirisinde aıtarlyqtaı ósim tirkeldi. Bul týraly AShM málim etti.

Qazaqstanda ósimdik maıy óndirisi artty: ósim 57%-ǵa jetti
Foto: Kazinform

Qaýymdastyqtyń málimetinshe, mundaı qarqyndy damýǵa yqpal etken birneshe faktor bar. Olardyń qatarynda kúnbaǵys egis alqaptarynyń keńeıýi, maı óńdeý kásiporyndary men aýyl sharýashylyǵy taýaryn óndirýshiler arasyndaǵy shıkizat satyp alýǵa arnalǵan forvardtyq kelisimsharttar negizinde yntymaqtastyqtyń damýy, qaıta óńdeý qýattarynyń artýy jáne kásiporyndardyń qosylǵan quny joǵary ónim óndirýge basymdyq berildi.

Sonymen qatar qazaqstandyq maı ónimderine syrtqy naryqtarda turaqty suranystyń bolýy óndiris ósiminiń negizgi qozǵaýshy kúshteriniń biri bolyp otyr.

Bıylǵy jyly Qazaqstanda maıly daqyldar egilgen alqaptardyń jalpy kólemi (maqta egisin eseptemegende) 5,179 mln gektardan asty. Bul ótken jylmen salystyrǵanda 30%-ǵa kóp.

— Qazirgi ýaqytta elimizdegi maı óńdeý kásiporyndarynyń jyldyq jıyntyq qýaty 5,4 mln tonnadan astam maıly daqyl tuqymyn óńdeýge jetedi. Onyń ishinde kúnbaǵys tuqymyn óńdeý qýaty 4,6 mln tonnany quraıdy. Alaıda egis alqaptarynyń ulǵaıýyna qaramastan, kásiporyndar áli de shıkizat tapshylyǵyn sezinip, óndiristik qýattaryn tolyq paıdalana almaı otyr, — delingen habarlamada.

MDQUQ ókilderiniń habarlaýynsha, salanyń aldaǵy damý baǵyty shıkizatty tereń óńdeýdi keńeıtýge jáne ishki ári syrtqy naryqtarǵa arnalǵan ónim kólemin arttyrýǵa baılanysty bolmaq.

Atap aıtqanda, 2026–2028 jyldary maı tazartý qýattaryn 2,1 esege arttyryp, jylyna 1 mln tonnadan astam deńgeıge jetkizý josparlanyp otyr. Al ólshep-oralǵan tazartylǵan kúnbaǵys maıynyń óndirisin 2,4 esege ulǵaıtý kózdelgen.

Budan bólek, 2027–2028 jyldary jyldyq óndiristik qýaty tıisinshe 72 myń jáne 50 myń tonnany quraıtyn ósimdik maılary men margarın óndiretin eki jobany iske qosý josparlanǵan.

Atalǵan jobalardy júzege asyrý Qazaqstannyń qaıta óńdeý áleýetin nyǵaıtýǵa, qosylǵan quny joǵary ónim túrlerin kóbeıtýge jáne otandyq maı ónerkásibiniń básekege qabilettiligin arttyrýǵa múmkindik beredi.

Eske sala keteıik, Qazaqstan kúnbaǵys qaýyzynyń túıirshikterin eksporttaýdan túsetin tabysty 6,15 ese arttyrdy. Bıyl toǵyz aıda Eýropa elderine 63,2 myń tonna ónim jóneltilip, eksporttyq kiris 3,4 mln dollarǵa jetti.