Qazaqstanda ósimdik sharýashylyǵy ónimderiniń eksporty 7 mln tonnaǵa jýyqtady

NUR-SULTAN. QazAqparat - Jyl basynan beri Aýyl sharýashylyǵy mınıstrliginiń memlekettik ınspektorlary respýblıkanyń fıtosanıtarlyq baqylaý beketterinde 88 myńnan astam kólik quralyn, onyń ishinde 68 myńǵa jýyq avtokólik, 17 myń vagon, 4 myń áýe jáne 100-den astam teńiz ben ózen kemelerin tekserdi, dep habarlaıdy QazAqparat.

Jyl basynan beri ımporttalǵan ónimderdi tekserý nátıjesinde ósimdikter karantıni salasyndaǵy zańnamany buzý boıynsha 1969 oqıǵa anyqtaldy. Onyń ishinde karantınge jatqyzylǵan ónimderge fıtosanıtarlyq sertıfıkattyń joqtyǵy boıynsha - 1522 oqıǵa, karantındik nysandardy anyqtaý boıynsha - 29 oqıǵa, fıto-sertıfıkattar sáıkessizdigi - 36, fıtosanıtarııalyq talaptardy buzýdyń - 96 jáne tyıym salynǵan ónimdi ákelýdiń 5 faktisi tirkeldi.

555 jaǵdaıda karantınge jatqyzylǵan ónim júk jóneltýshi elderge qaıtaryldy, taǵy 9 joıyldy. Sonymen qatar, 1,5 myń jeke jáne zańdy tulǵaǵa 91 895 338 teńge kóleminde aıyppul salyndy. Al 2019 jyly 2,3 ese az tárkilenip, 38,6 mln teńge óndirildi.

Ósimdikter karantıni zańnamasyn buzǵany úshin júk jóneltýshi elderge 177 notıfıkatsııa jiberildi.

Bıyl Qazaqstannyń ósimdik sharýashylyǵy ónimderiniń eksporty - 7 mln tonnaǵa jýyq, al respýblıkaǵa ımport 1,6 mln tonnany qurady.

Fıtosanıtarlyq baqylaý qyzmetiniń jumysy 2019 jyldyń 28 qazanynda Qazaqstanda «AÓK retteý máseleleri boıynsha QR keıbir zańnamalyq aktilerine ózgerister men tolyqtyrýlar engizý týraly» Zań qabyldanǵan soń aıtarlyqtaı jaqsardy. Jańa zańnama ósimdikter men ósimdik sharýashylyǵyn qorǵaýdy nyǵaıtý maqsatynda ósimdikter karantıni jónindegi memlekettik ınspektorlardyń qyzmetin keńeıtti.

Atap aıtqanda, olarǵa fıtosanıtarlyq baqylaý beketindegi tekserý jáne karantındik fıtosanıtarlyq saraptama jáne zerthanalyq saraptama júrgizý kezinde kólikti toqtatý jáne karantınge jatqyzylǵan ónim men memlekettik karantındik fıtosanıtarııalyq baqylaý nysandaryn ustaý quqyǵy berildi.

Esterińizge sala keteıik, memlekettik karantındik fıtosanıtarııalyq baqylaýdy fıtosanıtarııalyq baqylaý beketterinde ósimdikter karantıni jónindegi memlekettik ınspektorlar júzege asyrady. Olardyń qyzmeti Qazaqstan Respýblıkasynyń aýmaǵyna karantın ónimderiniń ákelinýi men taralýyna jol bermeýge baǵyttalǵan.

Qazir respýblıkada 26 syrtqy jáne 52 ishki fıtosanıtarııalyq baqylaý beketi jumys isteıdi. Atap aıtqanda, RF jáne QR shekaralas aımaqtarda karantın baqylaýyn kúsheıtý úshin 32 beket ashyldy.