Qazaqstanda orys tili qoǵamnyń suranysyna ıe jáne syrttan «qorǵaýǵa» muqtaj emes - M. Tájın
ASTANA. QazAqparat - Qazaqstannyń Reseı Federatsııasyndaǵy Tótenshe jáne Ókiletti Elshisi Marat Tájın TMD, shetelde turyp jatqan otandastar jáne halyqaralyq gýmanıtarlyq yqpaldastyq isteri jónindegi federaldyq agenttiktiń ókili Konstantın Kosachevpen kezdesti.
«Uzaq ári tushymdy suhbattan keıin K. Kosachev qazaqstandyq dıplomatııalyq mıssııanyń basshysyna agenttiktiń qyzmeti, aldyna qoıylǵan mindetteri jaıynda, onyń ishinde «sheteldegi otandastarǵa jeke kómek kórsetý, mádenı-gýmanıtarlyq qajettilikterin qamtamasyz etý týrasynda aıtyp berdi», - delingen habarlamada.
Óz kezeginde M. Tájın agenttiktiń barsha álem boıynsha gýmanıtarlyq yqpaldastyq ornatý, shetelderdegi Reseıdiń baı mádenı murasyn saqtaý jáne qoldaý isin joǵary baǵalady.
Qazaqstandaǵy orys tiliniń jaǵdaıy men damýyna qatysty taqyrypty qozǵaǵan taraptar, orys tiline resmı til retinde memleketten qoldaý jasalyp, barsha qazaqstandyq qoǵamnyń suranysyna ıe ekendigin, sonymen qatar qazaq tilimen teń jaǵdaıda qoldanylyp jatqandyǵyn jáne syrttan «qorǵaýǵa» muqtaj emestigin atap ótti, dep jazylǵan habarlamada.
M. Tájın agenttiktiń mindetteri - «budan bylaıǵy yqpaldastyq úderisteriniń irgetasyn qalaýǵa baǵyttalǵan mádenı-rýhanı sıpatqa ıe mindetter» ekendigine basa nazar aýdardy.
QR Elshisiniń aıtýynsha, sondaı birlesken tıimdi jumystardyń dáleli retinde kúzde Máskeýde ótkeli otyrǵan Qazaqstan jáne Reseı jazýshylarynyń kezdesýin, orys mádenıettanýshylary - Dmıtrıı Lıhachev, Lev Gýmılev, qytaıtanýshy Vasılıı Alekseev eńbekteriniń qazaq tiline aýdarý baǵdarlamasynyń júzege asyrylýyn keltirýge bolady. Sonymen qatar Ermıtaj, Tretıakov galereıasy syndy reseılik tanymal murajaılardyń Qazaqstandaǵy mýzeılerde, ásirese Astanadaǵy jańadan ashylǵan Ulttyq murajaıda kórmelerin ótkizý jaıy da sóz boldy.
Sóz sońynda Qazaqstannyń RF-daǵy Elshisi men agenttik jetekshisi áriptestikti tek Qazaqstan elshiligi aıasynda ǵana emes, sondaı-aq memlekettik organdar men qoǵamdyq uıymdar arasynda da yqpaldastyqty is júzinde keńeıtýge daıyn ekendikterin atap ótti.
