Qazaqstanda ortasha jalaqy mólsheri qandaı
ASTANA. KAZINFORM – Qazaqstanda 2026 jyldyń I toqsanyndaǵy ortasha aılyq jalaqy 461 486 teńge boldy. 2025 jyldyń tıisti toqsanǵa qaraǵanda 9,1%-ǵa ósken. Bul týraly Ulttyq statıstıka bıýrosy málim etti.
Bıýro dereginshe, ataýly jalaqy ındeksi ótken jyldyń sáıkes kezeńimen salystyrǵanda 109,1% bolsa, naqty mánde 97,7% boldy. Al 2026 jyldyń I toqsanyndaǵy medıanalyq jalaqy kólemi 331 527 teńgege jetti.
Statıstıkaǵa sáıkes, 2025 jyldyń sáıkes toqsanymen salystyrǵanda ortasha aılyq jalaqynyń eń joǵary ósimi aýyl, orman jáne balyq sharýashylyǵy salasynda tirkelgen – 20,3%. Sondaı-aq qarjy jáne saqtandyrý qyzmetinde – 18,1%, sýmen jabdyqtaý, sý burý, qaldyqtardy jınaý jáne óńdeý, lastanýdy joıý qyzmetterinde – 16,5%, elektr energııasymen, gazben, býmen, ystyq sýmen jáne kondıtsıonerlengen aýamen jabdyqtaý salasynda – 14,7%, kólik jáne qoımalaý salasynda – 12,9%, ónerkásipte – 11,6% ósim baıqaldy.
Al densaýlyq saqtaý jáne halyqqa áleýmettik qyzmet kórsetý salasynda ortasha aılyq jalaqy 7,0%-ǵa, bilim berý salasynda 4,2%-ǵa artqan.
Óńirler arasynda 2026 jyldyń I toqsanynda ortasha aılyq ataýly jalaqynyń eń joǵary ósimi Abaı oblysynda – 14,2%, Pavlodar oblysynda – 12,4%, Jetisý oblysynda – 12,2%, Almaty oblysynda 10,9% jáne Almaty qalasynda 10,7% deńgeıinde tirkeldi.
Buǵan deıin Qazaqstanda jalaqy bereshegi boıynsha 642 mln teńge anyqtalǵanyn jazǵanbyz.
