Qazaqstanda ortasha jalaqy – 382 279 teńge

ASTANA. KAZINFORM —  2024 jylǵy I toqsandaǵy Respýblıka boıynsha jalaqynyń ortasha máni — 382 279 teńgeni qurady.  

Ulttyq statıstıka bıýrosynyń málimetinshe,  2023 jyldyń tıisti toqsanyna qaraǵanda ósim: Ataýly mánde — 12,3% Naqty mánde — 2,7% Jalaqynyń medıanalyq máni (jalaqy qatarynyń ortalyq deńgeıi) baǵalaý boıynsha — 251 997 teńgeni qurady.

Al, óńirlerde 2023 jyldyń tıisti toqsanymen salystyrǵanda 2024 jyldyń I toqsanynda ortasha aılyq ataýly jalaqynyń eń kóp ósimi Batys Qazaqstan oblysynda — 18,2%-ǵa, Almaty qalasynda — 16,4%-ǵa, Aqtóbe oblysynda — 16,1%-ǵa, Pavlodar oblysynda — 15,9% baıqalǵan.

«Jalaqynyń ortasha mólsheri bir qyzmetkerdiń jalaqysynyń qosymsha aqylarynyń, ústemeaqylarynyń, syıaqylarynyń, salyqtarynyń jáne zeınetaqy aýdarymdarynyń barlyq túrlerin eskere otyryp kórsetiledi. Ol jalaqy qorynyń somasyn kásiporyndardaǵy qyzmetkerlerdiń naqty sanyna bólý arqyly esepteledi», —dep eskertedi Ulttyq statıstıka bıýrosy.

Buǵan deıin habarlaǵanymyzdaı, Qazaqstanda er men áıel arasyndaǵy jalaqy aıyrmashylyǵy kóp elderden joǵary.