Qazaqstanda ortasha ómir súrý uzaqtyǵyn 2025 jylǵa deıin 75 jasqa jetkizý kózdelýde
NUR-SULTAN. QazAqparat – Qazaqstanda ortasha ómir súrý uzaqtyǵyn 2025 jylǵa deıin 75 jasqa jetkizý kózdelip otyr. Qazirgi kórsetkish – 73 jas, dep habarlaıdy QazAqparat tilshisi.
«Qazirgi tańda Parlamentte halyqtyń densaýlyǵy jónindegi Kodeks qaralyp jatyr. Ol kodekstiń negizgi maqsattary - medıtsına qyzmetkerleriniń mártebesin kóterý, qazaqstandyqtardyń densaýlyǵyn nyǵaıtý, tsıfrly densaýlyq saqtaý salasyn engizý jáne baqylaýdy kúsheıtý. Úkimet densaýlyq saqtaý salasyn 2025 jylǵa deıin damytý jóninde memlekettik baǵdarlama qabyldady. Basty mindet – qazaqstandyq ómir jasynyń uzaqtyǵyn arttyrý. Búgingi kúni bul kórsetkish 73 jas bolsa, 2025 jylǵa deıin ómir uzaqtyǵyn 75 jasqa deıin jetkizý kózdelýde. Ol úshin Úkimet pen jergilikti atqarýshy organdardyń basty mindeti – kórsetiletin medıtsınalyq qyzmettiń sapasyn arttyrý, materıaldyq-tehnıkalyq bazany jaqsartyp, medıtsına qyzmetkerleriniń aılyǵyn kóterý, memlekettik-jekemenshik áriptestikti artyryp, salaǵa ınvestorlar men demeýshilerdi tartý», - dedi Úkimet basshysynyń orynbasary Berdibek Saparbaev OKQ-da ótken baspasóz máslıhatynda.
Onyń aıtýynsha, qazirdiń ózinde densaýlyq saqtaý salasynda quny 59 mlrd teńgege 120 jobany iske asyrý kózdelgen.
«Bizde dári-dármekpen qamtýdyń memlekettik retteýi jolǵa qoıylǵan. Bizde biletinderińizdeı, dári-dármek boıynsha jyl basynda mindetti túrde shý shyǵyp jatatyn. Bıyl bul máseleni retke keltirdik. Búgingi tańda dári-dármek boıynsha quny 221 mlrd teńgege jyldyq qajettiliktiń 88 paıyzy qamtamasyz etildi. Onyń 95 paıyzy emdeý mekemelerine jetkizildi», - dedi ol.
