Qazaqstanda Ortalyq Azııanyń Óńirlik sý konsortsıýmyn qurý usynyldy

NUR-SULTAN. QazAqparat - Qazaqstanda Óńirlik sý jáne energetıkalyq konsortsıým qurý qajet. Mundaı usynysty BUU Bas Assambleıasy 75-sessııasynyń jalpy saıası debattarynda sóz sóılegen QR Prezıdenti Qasym-Jomart Toqaev jasady, dep habarlaıdy QazAqparat tilshisi.

«Aımaqtyq yntymaqtastyq máselesin árdaıym basty nazarda ustaımyz. Qazirgi ýaqytta aımaqtaǵy elderdiń túrli salalardaǵy ózara is-qımyldy edáýir keńeıtýine baılanysty Ortalyq Azııa qarqyndy damyp keledi. Órkendegen, qýatty jáne birtutas Ortalyq Azııa óńirlik jáne jahandyq taraptardyń múddelerine saı keledi dep senemin», - dedi Memleket basshysy.

Qazaqstan Prezıdenti óńirlik turaqtylyq máselesinde transshekaralyq sý resýrstaryn utymdy paıdalanýdyń mańyzy erekshe ekendigin basa aıtty.

«Osyǵan baılanysty biz Óńirlik sý jáne energetıkalyq konsortsıým qurýdy usynamyz. Ortalyq Azııany damytý baǵytyndaǵy kún tártibin úılestirý úshin biz Almaty qalasyndaǵy Ornyqty damý maqsattary jónindegi BUU-nyń óńirlik ortalyǵyn ınstıtýtqa aınaldyrýǵa nıettimiz», - dedi Qasym-Jomart Toqaev.