Qazaqstanda Ortalyq Azııadaǵy eń iri júgeri óńdeý zaýyty salynyp jatyr
ASTANA. KAZINFORM — Túrkistan oblysynda «Qazkrahmal» zaýytynyń qurylysy jalǵasýda. Quny 35 mlrd teńgeni quraıtyn bul kásiporyn elimizdegi alǵashqy ári Ortalyq Azııadaǵy júgerini tereń óńdep, joǵary qosylǵan quny bar ónim shyǵaratyn eń iri keshen bolmaq. Bul týraly AShM málim etti.
Joba óńdeý ónerkásibin damytýǵa jáne óńir ekonomıkasyn ártaraptandyrýǵa baǵyttalǵan. Eki kezeńdi qamtıtyn jobanyń alǵashqysynda astyqty qabyldaý, keptirý jáne saqtaý úshin bazalyq ınfraqurylym quryldy. Qazirgi ýaqytta paıdalanýǵa berilgen. Ekinshi kezeń barysynda tereń óńdeý óndiristik kesheniniń qurylysy qarqyndy júrgizilip jatyr.
— Zaýyt tolyq iske qosylǵannan keıin jylyna 150 myń tonnaǵa deıin júgeri óńdep, 26 túrli ónim shyǵaratyn bolady. Olardyń qatarynda taǵamdyq glıýkoza, maltozaly shárbat, júgeri maıy, krahmal jáne qurama jem bar. Óndiris qaldyqsyz tsıkl qaǵıdaty boıynsha uıymdastyrylyp, tek GMO-syz tabıǵı shıkizat qoldanylady.
Basty maqsat — turaqty shıkizat bazasyn qalyptastyrý. Osyǵan baılanysty óńirde júgeri egis alqaptaryn ulǵaıtý jumystary júrgizilýde. Jańa alqaptar Túrkistan oblysynyń Shardara, Jetisaı jáne Maqtaaral aýdandarynda ıgerilýde.
Kásiporynnyń tehnologııalyq jaraqtandyrylýy 80% deńgeıinde avtomattandyrylǵan, bul ónim sapasyn joǵary deńgeıde baqylaýǵa, óndiristik shyǵyndardy azaıtýǵa jáne taýarlardyń básekege qabilettiligin arttyrýǵa múmkindik beredi. Joba aıasynda ozyq halyqaralyq tehnologııalar engizilip, sheteldik mamandardyń tájirıbesi eskeriledi.
Zaýyt ónimderi Qazaqstannyń ishki naryǵyna, sonyń ishinde taǵam jáne farmatsevtıka ónerkásibine baǵyttalady, sondaı-aq Azııa men Eýropa elderine eksportqa shyǵarylady. Júgeri krahmaly, shárbattar jáne basqa da ónimder túrli ónerkásip salalarynda keńinen qoldanylady, bul kásiporynnyń eksporttyq áleýet kúsheıtedi.
Bolashaqta zaýyt qýatyn jylyna 300 myń tonnaǵa deıin arttyrý jáne álemniń 100-den astam kompanııasymen halyqaralyq áriptestikti tereńdetý josparlanǵan.
Eske sala keteıik, buǵan deıin Aqmola oblysynda 300 mlrd teńgege astyqty tereń óńdeý zaýyty salynatynyn jazdyq.
