Qazaqstanda Ortalyq Azııadaǵy eń iri elektrondy saýda taratý ortalyqtarynyń biri ashylady
ASTANA. KAZINFORM - Saýda jáne ıntegratsııa mınıstri Arman Shaqqalıev pen YTO Express Co. basqarma tóraǵasyjáne negizin qalaýshy ıÝ Veıtszıamen kezdesýinde Ortalyq Azııadaǵy eń iri elektrondy saýda taratý ortalyqtarynyń biri Qazaqstanda ashylatyny málim boldy. Bul ortalyq taýarlardy jedel óńdeýdi jáne olardyń EO, EAEO jáne Ortalyq Azııa elderine jetkizilýin qamtamasyz etedi.
Intellektýaldyq IT-sheshimderdi engizý, logıstıkalyq úderisterdi tolyq avtomattandyrýǵa jáne jetkizilimderdiń kedendik súıemeldeýin qamtamasyz etýge múmkindik beredi. Kezdesý barysynda taraptar elektrondy saýda jáne onymen baılanysty salalardaǵy ózara tıimdi yntymaqtastyqtyń keleshegin talqylady.
Arman Shaqqalıev Qazaqstandaǵy elektrondyq saýda naryǵy jyl saıyn 20%-ǵa ósip, qarqyndy damyp kele jatqanyn atap ótti.
«Qytaıdyń elektrondy saýda naryǵy óziniń aýqymymen tań qaldyrady, onda satylymdardyń 70%-dan astamy onlaın júzege asyrylady. Qazaqstan óziniń tıimdi geografııalyq ornalasýymen halyqaralyq elektrondy saýdanyń negizgi tranzıttik aımaǵyna aınalýǵa umtylady. Qazposhtamen birlesken Qazaqstanda taratý ortalyǵyn qurý jobasy transshekaralyq saýdany damytýǵa jańa serpin beredi», – dedi Qazaqstannyń saýda mınıstri.
YTO Express Co. basqarma tóraǵasy ıÝ Veıtszıa bul jobanyń búkil óńirdi qamtıtyn Ortalyq Azııadaǵy jalǵyz joba ekenin atap ótti. Kompanııa birqatar elde taǵy 5 taratý ortalyǵyn salýdy josparlap otyr.
«Ótken jyly biz Almaty ákimdigimen belsendi yntymaqtastyqty bastadyq. Bul eki el ekonomıkasynyń damýyna jańa serpin beretin uzaq merzimdi joba. Yntymaqtastyq negizi úshin Qytaıda Shanhaı, Nankın jáne Ýhan qalalarynda 3 bondtyq qoıma ashtyq. Bul joba búkil aımaqty qamtıtyn Ortalyq Azııadaǵy jalǵyz joba. Osy taratý ortalyǵynan basqa, biz AQSh, Brazılııa, Taıland, Býdapesht jáne Dýbaıda taǵy 5 ortalyq salýdy josparlap otyrmyz», – dep habarlady ıÝ Veıtszıa.
Qytaı tarapy jobany jaqyn arada iske asyrýdy kózdep otyr. Arman Shaqqalıev Qazaqstannyń joba aıasynda belsendi jumysty jasaýǵa daıyn ekenin aıtty. Kezdesý qorytyndysy boıynsha taraptar birlesken is-qımyl josparyna qol qoıýǵa kelisti.
Bul joba óńirde ekonomıkalyq baılanystardy nyǵaıtý jáne halyqaralyq onlaın saýdany damytý jolyndaǵy mańyzdy qadam bolady.
