Qazaqstanda ortaazııalyq tasbaqalardy paıdalanýǵa 2040 jylǵa deıin tyıym salyndy
ASTANA. KAZINFORM - Qazaqstanda ortaazııalyq Testudo (Agrionemys) horsfieldii tasbaqalaryn men onyń derıvattaryn paıdalanýǵa 2040 jylǵa deıin tyıym salyndy, dep habarlaıdy QR Ekologııa jáne tabıǵı resýrstar mınıstrliginiń baspasóz qyzmeti.
Tyıym engizý týraly sheshim túr popýlıatsııasynyń jaı-kúıine júrgizilgen monıtorıng nátıjeleri men ǵylymı derekterdi taldaý negizinde qabyldandy. Atalǵan derekter antropogendik júktemeniń artýy jáne tabıǵı mekendeý ortasynyń ózgerýi jaǵdaıynda ony qorǵaý sharalaryn kúsheıtý qajettigin kórsetedi.
Ortaazııalyq tasbaqa Halyqaralyq tabıǵatty qorǵaý odaǵynyń (IUCN) Qyzyl tizimine «osal» sanaty boıynsha engizilgen, sondaı-aq jabaıy flora men faýna túrleriniń halyqaralyq saýdasy týraly konventsııanyń (CITES) II qosymshasyna engizilgen. Bul atalǵan túrdi halyqaralyq deńgeıde baqylaý men qorǵaýdyń qajettiligin kórsetedi.
Tyıymnyń engizilýi memlekettik baqylaýdyń tıimdiligin arttyryp, tabıǵı popýlıatsııalarǵa túsetin qysymdy azaıtýǵa, sondaı-aq Qazaqstannyń bıoalýantúrliligi men tabıǵı murasynyń mańyzdy quramdas bóligi bolyp tabylatyn ortaazııalyq tasbaqany uzaq merzimdi saqtaýdy qamtamasyz etýge múmkindik beredi.
Aıta ketý qajet, tyıym salynǵan janýarlarmen zańsyz aınalysqany úshin Qazaqstan Respýblıkasy Qylmystyq kodeksiniń 339-babyna sáıkes qylmystyq jaýapkershilik kózdelgen.
Kináli tulǵalarǵa 3000 AEK-ke deıin aıyppul salý, 800 saǵatqa deıin qoǵamdyq jumystarǵa tartý ne 3 jylǵa deıin bas bostandyǵynan aıyrý túrindegi jaza qoldanylýy múmkin.
Qosymsha shara retinde sot múlikti tárkileý jáne belgili bir qyzmetpen aınalysý quqyǵynan 5 jylǵa deıin aıyrý týraly sheshim qabyldaı alady.
Osyǵan deıin «Dostyq» baqylaý-ótkizý pýnktinde qyrǵyz-ózbek shekarasynda shekarashylar akvarıýmdyq tasbaqalardyń iri partııasyn zańsyz alyp ótpek bolǵan áreketin toqtatqany týraly jazdyq.