Qazaqstanda orta bilimdi jańǵyrtý boıynsha eki jumys komıssııasy quryldy
ASTANA. QazAqparat - Qazaqstanda mektep oqýshylarynyń demalys merzimin qysqartý jáne úshtildi bilim júıesin engizý boıynsha jumys komıssııalary quryldy. Bul týraly búgin Ortalyq kommýnıkalyq qyzmetinde ótken baspasóz máslıhatynda QR BǴM mektepke deıingi, orta bilim jáne aqparattyq tehnologııa departamentiniń dırektory Jańyl Jontaeva málim etti.
«Mınıstrdiń tapsyrmasy boıynsha jumys toptary quryldy, onda biz kanıkýl men úshtildi bilim berý máselelerin talqylaýdamyz. Komıssııalarda biz qoǵamnyń, ata-analardyń, úkimettik emes uıymdardyń usynystaryn tyńdaımyz. Túrli pikirler bar jáne biz olardy nazardan tys qaldyrmaımyz», - dedi J.Jontaeva.
Onyń aıtýynsha, jumys komıssııalarynyń otyrysy Bilim jáne ǵylym mınıstriniń, ata-analardyń, muǵalimderdiń, mektep dırektorlarynyń, bilim uıymdary basshylarynyń qatysýymen ár apta saıyn ótedi.
«Biz apta saıyn otyrys ótkizemiz, ol óz kezeginde, «Bilim» arnasy arqyly translıatsııalanady. Qoǵamnyń barlyq usynystary eskeriledi jáne ol boıynsha naqty sharalar atqarylady. Bizde oılanatyn ýaqyt bar, 2015-2016 oqý jylyn endi ǵana aıaqtap kelemiz. Bilim berýdiń jańa júıesi tek 1 qyrkúıekte 1 synyptarǵa ǵana engiziledi. Biz árbir jańashyldyqqa ǵylymı turǵyda negizdeme berýimiz kerek. Erteń oqýshylar úshin oqytý úderisin jeńildetý úshin, kásibı mamandardyń pikirine júginýimiz qajet», - dep atap ótti J. Jontaeva.
