Qazaqstanda órt qaýipsizdigi talaptaryn buzǵandarǵa 21 625 teńgege deıin aıyppul salynady
ASTANA. KAZINFORM – Qazaqstanda órt qaýpi joǵary kezeńniń bastalýyna baılanysty qaýipsizdik talaptarynyń saqtalýyna baqylaý kúsheıtildi. Tótenshe jaǵdaılar mınıstrligi ruqsat etilmegen jerde ot jaqqandarǵa 21 625 teńgege deıin aıyppul salynatynyn eskertti.
QR TJM Tótenshe jaǵdaılardyń aldyn alý komıteti tóraǵasynyń orynbasary Áset Jylqaıdarovtyń aıtýynsha, mundaı baqylaý jyl saıyn uıymdastyrylady.
– Mamandar ushqyshsyz ushý apparattary arqyly tútin shyqqan aýmaqtardy anyqtaıdy. Keıin sol jerlerge baryp, turǵyndarǵa qaýipsizdik talaptaryn túsindiredi. Qazir tekserýler barlyq óńirde júrgizilip jatyr, - dedi ol.
TJM ókilderi tamaq daıyndaý úshin otty tek arnaıy belgilengen oryndarda ǵana jaǵýǵa bolatynyn eske saldy.
– Eger zańsyz ot jaǵý alǵash ret anyqtalsa, eskertý beriledi. Al talap qaıta buzylǵan jaǵdaıda 5 AEK-ke deıin, ıaǵnı 21 625 teńge kóleminde aıyppul salynady, - dedi Á. Jylqaıdarov.
Sondaı-aq órt qaýpi joǵary kezeńde qurǵaq shópti órteýge, temeki tuqyly men sirińkeni tastaýǵa, sondaı-aq kún astynda órt tutanýyna sebep bolýy múmkin áınek sııaqty zattardy qaldyrýǵa bolmaıdy.
Aıta keteıik, buǵan deıin Premer-Mınıstr Oljas Bektenov birqatar óńirde tabıǵı qoryqtar men orman alqaptarynda órt tirkelip jatqanyn atap ótip, jaýapty qyzmetterge jedel áreket etýge daıyn bolýdy tapsyrǵan edi.
