Qazaqstanda ormanshylardyń jalaqysy artatyn boldy

ASTANA. QazAqparat - Orman sharýashylyǵy qyzmetkerleriniń jalaqysy 25 paıyzǵa artady. Bul týraly búgin QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov málim etti, dep habarlaıdy QazAqparat.

«Zańnamany jetildirý boıynsha usynystar Májilis qabyrǵasynda talqyǵa tústi. Depýtattar jumys toby aıasynda tujyrymdamalyq turǵydan, quqyqtyq retteý, redaktsııalyq sıpattaǵy túzetýler engizdi. Sonyń ishinde qosymsha shyǵyndardy qajet etetin usynystardyń keıbireýleri Respýblıkalyq bıýdjettik komıssııada qaralyp, ishinara qoldaý tapty. Atap aıtqanda, orman sharýashylyǵy qyzmetkerleriniń jalaqysyn 25 paıyzǵa kóbeıtýge Úkimet kelisim berip otyr»,-dedi A. Myrzahmetov «Qazaqstan Respýblıkasynyń keıbir zańnamalyq aktilerine ósimdikter men janýarlar dúnıesi máseleleri boıynsha ózgerister men tolyqtyrýlar engizý týraly» zań jobasyn tanystyrý barysynda.

Budan bólek, A.Myrzahmetov erekshe qorǵalatyn tabıǵı aýmaqtardy basqarýǵa jurtshylyqty tartý maqsatynda tabıǵat qorǵaý mekemeleri janynan Úılestirý keńesin qurý týraly normalaryn qabyldaýdy usyndy.

Budan bólek, ol halyq qalaýlylarynyń nazaryn ekologııalyq týrızmniń damýyn tejep otyrǵan ákimshilik kedergilerin joıýǵa aýdardy.

«Ulttyq parkterdiń aýmaǵynda ekologııalyq týrızmdi damytý jáne ákimshilik tosqaýyldardy joıý úshin týragentter bolyp tabylatyn jeke jáne zańdy tulǵalardyń aldymen lıtsenzııalar alýy boıynsha talapty alyp tastaý usynylyp otyr», - dedi A.Myrzahmetov.

Aıta keteıik, Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine ósimdikter men janýarlar dúnıesi máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady