Qazaqstanda ormanshylardyń eńbekaqysy ósetin boldy
ASTANA. QazAqparat - Orman sharýashylyǵy qyzmetkerleriniń jalaqysy 25 paıyzǵa kóteriledi. Bul týraly Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń múshesi Rashıt Ákimov málim etti, dep habarlaıdy QazAqparat.
«Agrarlyq komıtettiń keńeıtilgen otyrysynda «Qazaqstan Respýblıkasynyń keıbir zańnamalyq aktilerine ósimdikter men janýarlar dúnıesi máseleleri boıynsha ózgerister men tolyqtyrýlar engizý týraly» zań jobasyn ekinshi oqylymǵa shyǵaryp otyrmyz. Árıne, zań jobasyna qatysty túrli pikirler boldy, endi ony 1 maýsymda ekinshi oqylymda talqylaý jospary bar. Atap aıtqanda, ondaǵy ózgerister áleýmettik máselelerdi qamtyp otyr, ıaǵnı 2019 jyldyń 1 qańtarynan orman sharýashylyǵynda qyzmet etip júrgenderdiń jalaqysyn 25 paıyzǵa ósirý eskerilgen. Ózderińiz bilesizder, eń tómengi eńbekaqynyń biri osy saladaǵy adamdarǵa tıesili edi»,-dedi senator.
Onyń sózine qaraǵanda, bul baǵyttaǵy qadamdar orman sharýashylyǵynyń saqtalýy men damýyna ózindik ońtaıly áserin tıigizedi.
Budan buryn QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov qosymsha shyǵyndardy qajet etetin usynystar Respýblıkalyq bıýdjettik komıssııada qaralyp, ishinara qoldaý tapqanyn, osy oraıda orman sharýashylyǵy qyzmetkerleriniń jalaqysyn 25 paıyzǵa kóbeıtýge Úkimettiń kelisimi bar ekendigin habarlaǵan bolatyn.
