Qazaqstanda orman órtin ǵaryshtan baqylaıtyn tórt spýtnık bar

ASTANA. QazAqparat – Elimizde orman jáne dala órtterin ǵaryshtan baqylaıtyn tórt spýtnık bar, dep habarlaıdy QazAqparat Jibek joly telearnasyna silteme jasap.

Olardyń árqaısysy el aýmaǵyn kúnine eki ret sýretke túsiredi, qashyqtan zondtaý arqyly órt oshaqtary anyqtalady.

Spýtnık ushqan soń derekter jerústi stantsııasyna túsirilip, jer betiniń temperatýrasyn anyqtaý úshin óńdeledi. Sodan soń Tótenshe jaǵdaılar mınıstrligine arnaıy geoservısterge júkteledi. Olardyń qabyldanyp, óńdelip, jarııalanýyna 2 saǵat ýaqyt ketedi.

«Abaı oblysyndaǵy órtke kelsek, bul túsirilim 13:20-da geoservısterge júkteldi, sol sátten bastap, Tótenshe jaǵdaılar mınıstrliginde de, Ekologııa mınıstrliginde de «Semeı ormanynda» órttiń bastalǵany týraly aqparat jetkizildi», - dedi «Qazaqstan Ǵarysh sapary» UK AQ Basqarma tóraǵasynyń orynbasary Ósken Toıshybekov «Jańa ýaqyt» aqparattyq-saraptamalyq baǵdarlamasynda.

Aıta keteıik, Semeı ormanyna qanshalyqty zalal kelgenin órt tolyq sóndirilgen soń arnaıy komıssııa esepteıtin bolady.

Qazirgi ýaqytta Abaı oblysynda órtti sóndirý úsh baǵytta jalǵasýda (ońtústik, batys jáne shyǵys jıekter). Shyǵys baǵytta aýyr tehnıkamen mıneraldanǵan jolaqtar jasaý jumystary júrgizilýde.