Qazaqstanda orman-klımattyq jaǵdaıdy jaqsartýǵa baǵyttalǵan joba iske qosyldy
QONAEV. KAZINFORM - Búgin elimizdegi alǵashqy jeke orman sharýashylyǵy jobasy aıasynda Almaty oblysynda dala jumystary júrgizildi.
Sheńgeldi aýyldyq okrýgi Qapshaǵaı sý qoımasynyń jaǵasynda tal egý jumystary bastaldy. Sheteldik ınvestorlardyń bastamasymen buryn qaraýsyz qalǵan aýyl sharýashylyq alqaptary bolǵan 1500 gektar jerge 3,5 mıllıon túp aǵash kóshetterin otyrǵyzý josparlanyp otyr. Olardy sýarýǵa sýdy únemdeıtin zamanaýı tamshylatyp sýarý tehnologııasy qoldanylmaq.
Jobanyń maqsaty – tabıǵı ortany qalpyna keltirý, topyraq jaǵdaıyn jaqsartý jáne 30 jyl ishinde kómirqyshqyl gazynyń shyǵaryndylaryn azaıtý. Joba halyqaralyq ekologııalyq standarttarǵa sáıkes keledi jáne CCB Gold pen Abacus baǵdarlamalary boıynsha joǵary reıtıngke qol jetkizý úshin synaqtan ótip jatyr.
- Halyqaralyq uıymdarmen durys jumys nátıjesinde qosymsha ınvestıtsııa tartyldy. Bul jobanyń sheńberinde Almaty oblysynyń pıtomnıkteri tapsyrys aldy. Byltyr shybyq otyrǵyzylǵan, olar bıyl ósip qaldy. Endi ony janyndaǵy aýmaqqa kóshet retinde otyrǵyzyp jatyr. Bıylǵa 200 gektar josparlanǵan. Jalpy 3 jylda 1500 gektar jer kóshetpen qamtylady, - dedi Almaty oblysynyń ákimi Marat Sultanǵazıev.
Arnaıy bólingen aýmaqta jergilikti pıtomnık qurylyp, tamshylatyp sýarý júıesi ornatylǵan. Onda sý Qapshaǵaı qoımasynan tartylady. Qolaıly aýmaqta aldymen kóshet ósiriledi, keıin olar belgilengen jerge otyrǵyzylady. Qazir aýmaqty zerdeleý, qajetti ınfraqurylymdy salý sekildi naqty is-sharalar jospary ázirlengen.
«Atameken» UQP basqarma tóraǵasy Raıymbek Batalov bul joba «Taza Qazaqstan» baǵdarlamasy aıasynda júzege asyp jatqanyn atap ótti.
– Bul – elimizdegi biregeı ekologııalyq joba, ekologııaǵa salynǵan jeke ınvestıtsııa. Bul bastama bıznes úshin orman sharýashylyǵynyń esigin ashady, - dedi ol.
Joba ókilderiniń aıtýynsha, bastama BUU-nyń turaqty damý maqsatyna qol jetkizýge yqpal etedi, olar:
* klımattyń ózgerýimen kúresý;
* jer men ekojúıeni qalpyna keltirý;
* jumys oryndaryn qurý jáne turaqty ekonomıkalyq ósýdi qoldaý.
Eske salaıyq, buǵan deıin Prezıdent Qazaqstan klımatqa qatysty kún tártibinde óńirlik yntymaqtastyq, pragmatıkalyq ambıtsııa jáne halyqaralyq yqpaldastyqqa basymdyq beretinin aıtqan edi.
Sondaı-aq EO klımattyq turaqtylyq pen sý qaýipsizdigin arttyrý jobalaryna 86 mln eýro ınvestıtsııa salatynyn jazǵanbyz.
