Qazaqstanda orman alqabynyń kólemi ulǵaıyp keledi

ASTANA. KAZINFORM — Qazaqstanda orman qorynyń aýmaǵy jyl saıyn artyp keledi. Bul týraly QR Ekologııa jáne tabıǵı resýrstar vıtse-mınıstri Nurlan Qurmalaev málimdedi.

Mınıstrlik dereginshe, táýelsizdik jyldarynda eldegi orman qory 6,9 mln gektarǵa kóbeıip, búginde 31,4 mln gektarǵa jetti. Ormanmen kómkerilgen jer kólemi 14 mln gektardy qurap, eldegi orman úlesi 3,8%-dan 5,1%-ǵa deıin artqan.

Vıtse-mınıstrdiń aıtýynsha, Qazaqstan aldaǵy ýaqytta da orman alqaptaryn keńeıtýdi jalǵastyrady. 2030 jylǵa qaraı ormanmen kómkerilgen jer kólemin 14,5 mln gektarǵa jetkizý josparlanǵan.

Memleket basshysynyń tapsyrmasyna sáıkes, elimizde memlekettik orman qorynda 2 mlrd aǵash otyrǵyzý jumysy júrgizilip jatyr. 2021 jyldan beri 1,6 mlrd-tan astam kóshet otyrǵyzylǵan.

Sonymen qatar, Aral óńirindegi ekologııalyq jaǵdaıǵa erekshe nazar aýdarylyp otyr.

— Tıimdi tásilderdiń biri — qurǵaǵan teńiz tabanyn jergilikti ósimdiktermen, ásirese sekseýilmen kógaldandyrý. Bul topyraqty bekitip, qum kóshýi men shań-tozańnyń taralýyn azaıtady. 2021 jyldan beri 1,1 mln gektar jerge sekseýil otyrǵyzyldy. Ózbekstanmen birlesken jumystar da jalǵasyp jatyr, — dedi Nurlan Qurmalaev.

Taǵy bir mańyzdy qadam — Qazaqstan usynǵan «Ortalyq Azııanyń jasyl qalqany» bastamasy. Bul bastama jerdiń tozýyn azaıtyp, qumnyń kóshýin toqtatýǵa jáne óńirdiń aýa raıyn jaqsartýǵa kómektesetin orman alqaptaryn kóbeıtýdi kózdeıdi.

Aıta keteıik, buǵan deıin jerdiń tozýy men shóleıttenýge qarsy Qazaqstan qalaı kúresip jatqanyn jazǵanbyz.