Qazaqstanda «Órleý» ulttyq pedagogtardyń biliktiligin arttyrý ortalyǵy quryldy

Bul týraly búgin elordadaǵy Nazarbaev zııatkerlik mektebinde óz jumysyn bastaǵan jalpy bilim beretin mektepter pedagogtarynyń biliktiligin arttyrý kýrsy barysynda QR Bilim jáne ǵylym mınıstri Baqytjan Jumaǵulov aıtty.

Bilim berý júıesin jańǵyrtý zamanaýı mektepterdegi ustaz týraly túbegeıli jańa túsiniktiń paıda bolýyna negizdelgenin atap ótken mınıstr: «Osy maqsatta respýblıkada qoldanystaǵy biliktilik arttyrý júıesin qaıta qarastyrý bastaldy. Biliktilik arttyrýdyń bazalyq kezenderi qurydy», - dedi.

Onyń atap ótýinshe, Pedagogıkalyq sheberlik ortalyǵy jáne onyń Nazarbaev zııatkerlik mektepterdiń bazasyndaǵy fılıaldary birinshi keshen bolyp tabylady.  Bolashaqta bul ortalyqta elimizdiń barlyq mektepterine otandyq jáne sheteldik tájirıbeni taratýǵa qabiletti myqty pedagogtar shoǵyrlanady.

«Búgin qalyptastyryp otyrǵan ekinshi keshen  - «Órleý» ulttyq pedagogtardyń biliktiligin arttyrý ortalyǵy» AQ. Ol jumys istep turǵan Respýblıkalyq bilim berý júıesindegi basshylyq jáne ǵylymı-pedagogıkalyq kadrlardyń biliktiligin arttyrý ınstıtýty men oblystar men Astana jáne Almaty qalalaryndaǵy pedagogıka salasy qyzmetkerleriniń biliktiligin arttyrýdyń 16 ınstıtýtynyń basyn qosady», - dedi B.Jumaǵulov.