Qazaqstanda organıkalyq tyńaıtqysh óndirýge jańa ulttyq standart engiziledi
ASTANA. KAZINFORM - 2027 jyldyń 1 qańtarynan bastap Qazaqstan Respýblıkasynyń aýmaǵynda resmı bekitilgen «Organıkalyq tyńaıtqyshtar. Ónerkásiptik óndiriske qoıylatyn jalpy tehnıkalyq talaptar» QR ST standarty qoldanysqa engiziledi, dep habarlaıdy QR Saýda jáne ıntegratsııa mınıstrliginiń baspasóz qyzmeti.
Qujat óndirýshiler úshin biryńǵaı erejelerdi qalyptastyryp, otandyq ónimderdiń jalpy sapasyn arttyrýǵa jáne eldegi organıkalyq eginshilik ekojúıesin damytýǵa negizgi baǵyt-baǵdar beredi.
Jańa standart aıasynda mal sharýashylyǵy qaldyqtaryn, atap aıtqanda mal qıyn, qus sańǵyryǵyn, komposttardy, bıogýmýsty jáne ózge de shıkizat túrlerin ónerkásiptik qaıta óńdeý protsesteri júıeli túrde reglamentteldi.
Qujatta bıogaz qondyrǵylarynan alynatyn dıgestatty qaıta óńdeýge erekshe kóńil bólinip, aerobty jáne vermıkomposttaý, metantenkterdegi anaerobty fermentteý, sondaı-aq keptirý jáne túıirshikteý protsesteri úshin naqty tehnologııalyq normalar bekitildi. Bul otandyq kásiporyndarǵa óndiristik qýattardy tıimdi paıdalanyp, halyqaralyq talaptarǵa saı joǵary sapaly tyńaıtqyshtar shyǵarýǵa múmkindik beredi.
Ónimderdiń qaýipsizdigin qamtamasyz etý maqsatynda standartta qatań veterınarııalyq-sanıtarııalyq kórsetkishter qarastyrylǵan. Daıyn organıkalyq tyńaıtqyshtarda patogendi mıkrofloranyń, sonyń ishinde salmonellalardyń jáne gelmınt jumyrtqalarynyń bolýyna tolyqtaı tyıym salynady.
Sonymen qatar, qorǵasyn, kadmıı, synap jáne kúshála sııaqty aýyr metaldardyń shekti ruqsat etilgen kontsentratsııalary men ónimniń radıatsııalyq fonyna qoıylatyn talaptar gıgıenalyq normatıvterge sáıkestendirildi.
Belgilengen gıgıenalyq normatıvterden aspaıtyn ónimniń tabıǵı jáne jasandy radıatsııalyq fony da normalanady. Qujat óndiristik alańdardy, bıoreaktorlardy, ventılıatsııa júıelerin jabdyqtaýǵa jáne qorshaǵan ortanyń lastanýyn boldyrmaýǵa qoıylatyn talaptardy egjeı-tegjeıli túsindiredi. Budan bólek, standart tyńaıtqyshtardy ólshep-oraý, tańbalaý, tasymaldaý jáne saqtaý tártibin aıqyndaıdy.
-Qujatty ázirleý «Tyńaıtqyshtardyń qaýipsizdigine qoıylatyn talaptar» Tehnıkalyq reglamentiniń (QR Aýyl sharýashylyǵy mınıstriniń № 26 buıryǵy) normalaryn tikeleı iske asyrý sheńberinde oryndaldy. Bul rette ekologııalyq zańnamanyń talaptary, órt jáne sanıtarııalyq-gıgıenalyq qaýipsizdik normalary eskerildi,-delingen habarlamada.
Osyǵan deıin elimizde organıkalyq jáne ekoónimder úshin jańa ereje engizilmek.
