Qazaqstanda organ transplantatsııasyn qajet etetinder jıilegen
ASTANA. KAZINFORM - «Qazaqstan halqyna» QQ Basqarma tóraǵasy Bolat Jámishev elimizde 4 myń adamǵa organ transplantatsııasy qajet ekenin aıtty.
«S.D.Asfendııarov atyndaǵy QazUMÝ ýnıversıtettik klınıkasynda 2023 jyldyń mamyrynan jeltoqsanyna deıin kózdiń móldir qabyǵyn transplantatsııalaý boıynsha 93 ota jasaldy», - dedi B. Jámishev Ortalyq kommýnıkatsııalar qyzmetindegi dóńgelek ústel otyrysynda.
Qor málimetine qaraǵanda, atalǵan móldir qabyqty aýystyrýdy qajet etetin 304 patsıent transplantatsııa arqyly kórý qabiletin qalpyna keltire alady. Qazaqstanda donorlyq materıaldyń jetkiliksizdigine baılanysty ony AQSh-tan tasymaldaý júzege asyrylady. Jobanyń bıýdjeti - 374 mln teńge.
«Jalpy, dárigerler qordan aqsha qajet emes ekenin aıtyp otyr. ıAǵnı qaıtys bolǵan adamdardyń organdaryn donorlyq maqsatta alý úshin elimizde zańdy ózgertý kerek deıdi. Jaqynda Densaýlyq saqtaý mınıstrliginiń bastamasymen tıisti konferentsııa ótkizdik. Mınıstrlikpen birge biz úkimetti de, qoǵamdy da transplantatsııa jáne donorlyq týraly zańdy ózgertýge shaqyrý maqsatynda osy konferentsııaǵa qatystyq. Óıtkeni bizdiń elimiz bul jaǵynan reıtıngtiń eń tómengi satysyna túsip ketti, ıaǵnı 4 myń adamǵa organ transplantatsııasy qajet», - dedi B. Jámishev.
