Qazaqstanda óńirlik kreatıvti ındýstrııany damytýǵa baǵyttalǵan Creative Aimaq jobasy ótedi
ASTANA. KAZINFORM - Kreatıvti ındýstrııalardy damytý qory óńirlerdiń shyǵarmashylyq áleýetin tanytyp, jergilikti brendter men mádenı bastamalardy kópshilikke keńinen nasıhattaýǵa arnalǵan Creative Aimaq jármeńkesin bastaıdy.
QR Mádenıet jáne aqparat mınıstrligi baspasóz qyzmetiniń habarlaýynsha, joba aıasynda kórme, sheberlik sabaǵy, mádenı baǵdarlama jáne jergilikti óndirýshilerdiń ónimderin tanystyrý is-sharalary uıymdastyrylady.
Jobanyń alǵashqy aptasy Aqmola oblysynda ótedi.
11-14 maýsym aralyǵynda Kreatıvti ındýstrııalardy damytý qory alańynda óńir óndirýshileri óz ónimderi men avtorlyq jobalaryn kópshilikke usynady.
Búginde Aqmola oblysynda kreatıvti ındýstrııa salasynda 1 myńǵa jýyq kásipkerlik nysan tirkelgen. Óńirdegi neǵurlym damyǵan baǵyttardyń qatarynda baǵdarlamalyq qamtamasyz etýdi ázirleý, kompıýterlik oıyndardy shyǵarý, toqyma jáne tigin óndirisi, ulttyq kıim tigý, sondaı-aq kádesyı daıyndaý bar.
-Joba aıasynda kelýshiler óńir sheberleri men óndirýshilerdiń biregeı ónimderin satyp ala alady,-delingen habarlamada.
Aıta keteıik, osyǵan deıin Mádenıet jáne aqparat mınıstri Aıda Balaeva kreatıvti ındýstrııanyń Qazaqstannyń jańa ekonomıkalyq saıasatynyń mańyzdy baǵytyna aınalyp kele jatqany týraly aıtty.
