Qazaqstanda óńirlik áleýmettik tólemderdi tsıfrlandyrýǵa arnalǵan 13 baǵyt aıqyndaldy
ASTANA. KAZINFORM – Eńbek jáne halyqty áleýmettik qorǵaý mınıstri Asqarbek Ertaevtyń tóraǵalyǵymen ótken keńeste Biryńǵaı tsıfrlyq platformany damytý jáne áleýmettik qyzmetterdi avtomattandyrý máseleleri qaraldy.
Jıyn barysynda Eńbek jáne halyqty áleýmettik qorǵaý mınıstrligi jergilikti atqarýshy organdarmen birlesip, máslıhat sheshimimen taǵaıyndalatyn óńirlik áleýmettik tólemderge taldaý júrgizgeni aıtyldy.
Nátıjesinde tsıfrlyq formatqa kóshirýdi qajet etetin 13 baǵyt anyqtalǵan.
Vedomstvo málimetinshe, bul áleýmettik qoldaý kórsetý tásilderin birizdendirip, kómekti alý protsesin ashyq ári jedel etýge múmkindik beredi.
Qazirgi ýaqytta mınıstrliktiń Biryńǵaı tsıfrlyq platformasy áleýmettik qoldaý sharalaryn avtomattandyrýǵa arnalǵan negizgi tehnologııalyq baza retinde qalyptasyp otyr.
Sonymen qatar Oqý-aǵartý mınıstrliginiń qyzmetterin tsıfrlandyrý baǵytynda da jumystar júrgizilgen.
Platformanyń memlekettik derekter bazalary jáne eGov portalymen ıntegratsııalanýy nátıjesinde bıylǵy mamyr aıynyń sońynan bastap «Jalpyǵa birdeı bilim berýdi» áleýmettik qoldaý sharalaryn tsıfrly formatta kórsetý múmkindigi paıda bolady.
- Endi ata-analar qaǵaz anyqtama jınap, mártebesin rastaýǵa mindetti bolmaıdy.
Júıe otbasynyń áleýmettik jaǵdaıy týraly málimetter negizinde kómekti alý quqyǵyn avtomatty túrde anyqtaıdy, - delingen Eńbek jáne halyqty áleýmettik qorǵaý mınıstrligi taratqan aqparatta.
Keńes qorytyndysynda Asqarbek Ertaev tsıfrlandyrý eń aldymen azamattarǵa qolaıly jaǵdaı jasaýǵa baǵyttalýy tıis ekenin aıtty.
Mınıstrlik 2026 jyldyń sońyna deıin platformany barlyq óńirge engizip, ony Qarjy mınıstrligi men Densaýlyq saqtaý mınıstrliginiń aqparattyq júıelerimen ıntegratsııalaýdy josparlap otyr.
Aıta keteıik, «Nur Joly» ótkizý beketinde 1 mamyrdan bastap tasymaldaýdyń tsıfrlyq tólqujatyn qoldanýǵa bolady.
