Qazaqstanda ónimdilikti arttyrý úshin joǵary sapaly tuqymdar ortalyǵy qurylady

ASTANA. KAZINFORM – Joba 2026 jyly J. Jıembaev atyndaǵy Qazaq ósimdikterdi qorǵaý jáne karantın ǵylymı-zertteý ınstıtýty bazasynda júzege asyrylady, dep habarlaıdy AShM baspasóz qyzmeti.

Ozyq joǵary sapaly tuqymdar ortalyǵy QR AShM qoldaýymen qurylady.

Ortalyq zamanaýı jabdyqtarmen qamtamasyz etilip, joǵary bilikti mamandarmen jasaqtalady. Onyń negizgi mindeti – ónimdilik pen ekologııalyq qaýipsizdikke qater tóndiretin patogenderge qarsy kúres júrgizý.

Ortalyq tuqym sharýashylyqtarymen tyǵyz yntymaqtastyq ornatyp, ártúrli daqyl tuqymdarynyń synamalaryn taldaýdan ótkizedi. Jobanyń basty maqsaty – 2030 jylǵa qaraı otandyq tuqym úlesin 80%-ǵa deıin jetkizý.

Fıtoekspertızanyń ınnovatsııalyq ádisterin qoldaný jáne tuqymdardy saýyqtyrý ónimdilikti arttyryp qana qoımaı, eginniń qaýipsizdigin qamtamasyz etýge múmkindik beredi. Mamandardyń baǵalaýy boıynsha, tuqymdyq qordy saýyqtyrý ósimdik aýrýlarymen kúrestegi negizgi faktor bolyp tabylady, sebebi olardyń 70%-y tuqym arqyly taralady. Ortalyqtyń jumysy nátıjesinde aýyl sharýashylyǵy daqyldarynyń ónimdiligi keminde 40%-ǵa artýy múmkin dep kútilýde.

Osyǵan deıin bıyl elimizde aýyl sharýashylyǵy daqyldary egiletin aýmaq byltyrǵy jylǵa qaraǵanda 518 myń gektarǵa artatyny aıtyldy.