Qazaqstanda onlaın saýda eki ese ósti – mınıstr

ASTANA. KAZINFORM – Sońǵy úsh jylda elimizde onlaın saýda eki ese ósip, 2 mlrd AQSh dollarynan asty. Bul týraly Saýda jáne ıntegratsııa mınıstri Arman Shaqqalıev málim etti.

- Elektrondy kommertsııa – otandyq jáne halyqaralyq marketpleıster, shaǵyn jáne orta bıznes úshin jańa múmkindikter ashady. Sonymen qatar elimizdiń eksporttyq áleýetin keńeıtip, jahandyq naryqtaǵy básekege qabiletti arttyrady. Bizdiń mınıstrlik eksportty qoldaý saıasatyn júıeli júrgizip keledi, biz otandyq kompanııalarǵa analıtıkalyq jáne strategııalyq qoldaýdan bastap, quqyqtyq jáne marketıngtik konsýltatsııa beremiz, - dedi Arman Shaqqalıev elordada ótip jatqan EXPO Goods Central Asia alǵashqy halyqaralyq forým-kórmesinde. 

Mınıstrdiń sózine sensek, vedomstvo qazaqstandyq eksporttaýshylarǵa shetelden seriktes tabýǵa, halyqaralyq kórmeler men saýda-ekonomıkalyq mıssııalarǵa qatysýǵa jan-jaqty járdemdesedi. 

- EXPO Goods Central Asia alǵashqy halyqaralyq forým-kórmesi jaı ǵana ónimderdi tanystyrý emes, bul naqty sheshimder qabyldaý, iskerlik baılanys ornatyp, kelisim jasaýǵa arnalǵan tájirıbelik platforma, - dep tolyqtyrdy vedomstvo basshysy. 

Buǵan deıin habarlaǵanymyzdaı Qazaqstan men Ortalyq Azııa arasyndaǵy taýar aınalymy 7,6 mlrd dollarǵa jetti. 

Aıta keteıik, elordada EXPO Goods Central Asia atty 159 otandyq jáne halyqaralyq saýda markasynyń qatysýymen kórme jáne forým ótip jatyr.