Qazaqstanda onlaın satýǵa tyıym salynǵan taýarlardyń biryńǵaı tizbesi jasaldy
ASTANA. KAZINFORM – QR Saýda jáne ıntegratsııa mınıstrligi elektrondyq saýda alańdarynda ornalastyrýǵa jáne satýǵa tyıym salynǵan ári shektelgen taýarlardyń tizbesin ázirledi.
Tizbe «Saýda qyzmetin retteý týraly» zań talaptaryna sáıkes múddeli memlekettik organdar usynǵan aqparat negizinde jasaqtaldy.
Onda Qazaqstan aýmaǵynda aınalymyna tyıym salynǵan nemese shekteý qoıylǵan, onyń ishinde elektrondyq saýda arqyly satylatyn taýarlar týraly málimetter jınaqtalǵan.
– Tizbe elektrondyq saýda alańdarynyń ıelerine, ınternet-dúkenderge, satýshylarǵa jáne elektrondyq saýdanyń basqa da qatysýshylaryna qoldanystaǵy shekteýler týraly ózekti aqparatty jedel alýǵa jáne taýarlardy ornalastyrý men satý kezinde zańnama talaptaryn eskerýge múmkindik beredi, – delingen habarlamada.
Mınıstrliktiń málimetinshe, bul elektrondyq saýda alańdaryna taýar kartochkalaryn moderatsııalaý kezinde biryńǵaı tásildi qoldanýǵa, al satýshylarǵa ónimdi ótkizý múmkindigin aldyn ala baǵalaýǵa jaǵdaı jasaıdy.
Atalǵan tizbe aqparattyq-anyqtamalyq sıpatqa ıe jáne qoldanystaǵy zańnama talaptaryn júıeleýge baǵyttalǵan.
Quqyq buzýshylyqtar anyqtalǵan jaǵdaıda ákimshilik jaýapkershilikke tartý Ákimshilik quqyq buzýshylyq týraly kodekske sáıkes quzyrly memlekettik organdar arqyly júzege asyrylady.
Saýda jáne ıntegratsııa mınıstrligi zańnamadaǵy ózgerister men memlekettik organdardan túsetin aqparat negizinde tizbeni turaqty túrde jańartyp otyrady.
Aıta keteıik, Qazaqstanda jasandy ıntellektige negizdelgen biryńǵaı tsıfrlyq saýda ekojúıesi qurylady.
