Qazaqstanda onlaın-saqtandyrý engiziledi
ASTANA. QazAqparat - Qazaqstanda onlaın-saqtandyrý engiziledi. Bul týraly Májilistiń Qarjy jáne bıýdjet komıteti men «Nur Otan» partııasynyń Májilistegi fraktsııasy janyndaǵy Ekonomıkalyq saıasat jónindegi keńestiń dóńgelek ústel otyrysynda QR Ulttyq bank tóraǵasynyń orynbasary Janat Qurmanov málim etti, dep habarlaıdy QazAqparat.
Shara barysynda depýtattar «Qazaqstan Respýblıkasynyń keıbir zańnamalyq aktilerine saqtandyrý jáne saqtandyrý qyzmeti máseleleri boıynsha ózgerister men tolyqtyrýlar engizý týraly» zań jobasyn talqylady.
«Qazaqstan aýmaǵynda saqtandyrý qyzmetteriniń qoljetimdigi qashyqtyqtan basqaratyn elektrondy tsıfrlyq qyzmetterdi engizbeı qamtamasyz etilmeıdi. Zań jobasymen onlaın-saqtandyrýdy engizý qarastyrylǵan. Onyń nátıjesinde turǵyndar saqtandyrý sharttaryn saqtandyrý kompanııalarynyń ınternet-resýrstary arqyly bekitý múmkindigin alady. ıAǵnı adamdar keńseler men saqtandyrý agentterine barmaı-aq osy sharalardy júzege asyrady. Sonymen qatar saqtandyrý sharttaryna ózgerister engizý men saqtandyrý tólemderin alý úshin onlaın baılanys arqyly atqarýǵa bolady», - dedi Janat Qurmanov.
Onyń atap ótýinshe, saqtandyrý sektory sheteldik kompanııalar fılıaldarynyń naryǵyna qol jetimdilik boıynsha DSU talaptary iske asyrylatyn birinshi sektor bolyp otyr. Bul qadamdar 2020 jyly iske asady. Osy jaǵdaılarda ulttyq saqtandyrý sektory sheteldik oıynshylardyń básekelestigine tótep berýi úshin turaqty damý modelin qamtamasyz etýge nazar aýdarýy tıis.
Saqtandyrý naryǵyn damytýdy tejep turǵan sebepterdiń tizbegine toqtalatyn bolsaq, bul rette erikti túrde saqtandyrýdyń jetkiliksiz damýy, halyq men bıznestiń saqtandyrýǵa senimsizdigi, Qazaqstannyń barsha aýmaǵynda saqtandyrýǵa tómen qoljetimdilik, sondaı-aq saqtandyrý naryǵynda tsıfrlyq tehnologııalardyń joqtyǵy sekildi máseleler bar. Osy ahýaldy eskere otyryp, zań jobasynda sapa men qoljetimdilikti arttyrýǵa, saqtandyrý qyzmetteri tutynýshylarynyń quqyǵyn qorǵaýǵa ekpin qoıylyp otyr.
Qazaqstanda qarjy naryǵy aıtarlyqtaı qarqyndy damyp kele jatqanyna toqtalǵan J. Qurmanov: «Alaıda birkelki emes deńgeıde damýda jáne osy turǵyda saqtandyrý naryǵy ázirge el ekonomıkasy aldynda turǵan mindetterden qalys kele jatyr, sondyqtan ekonomıkany damytýdaǵy onyń máni tıisti deńgeıde emes», - dedi.
Onyń sózine qaraǵanda, sońǵy 10 jylda elimizde barlyq saqtandyrý uıymdarynyń saqtandyrý syılyqaqylary men aktıvteriniń kólemi boıynsha Reseı jáne Ýkraına sekildi elderden keıin kele jatyr.
«Saqtandyrý naryǵy ázirge halyqtyń, bıznestiń, Qazaqstan ekonomıkasynyń suranysyna sáıkes kelmeı otyr jáne olardyń aldyna qoıylǵan maqsattardy sheshken joq», - dedi ol.
