Qazaqstanda onlaın notarıattyq qyzmetter tizimi keńeıtildi

ASTANA. QazAqparat - Qazaqstanda onlaın rejımde qoljetimdi notarıattyq qyzmetter tizbesi keńeıtildi, dep habarlaıdy QazAqparat QR Ádilet mınıstrliginiń baspasóz qyzmetine silteme jasap.

Jobanyń birinshi kezeńinde onlaın formatta senimhattardyń tek úsh túri ǵana resimdelip kelse, qazir múlikke ıelik etýge baılanysty senimhattardan ózge, barlyq túrleri EGOV Mobile arqyly elektrondyq túrde qoljetimdi.

Vıtse-mınıstr Bekbolat Moldabekovtyń aıtýynsha, 2023 jylǵy 11 sáýirden bastap Ádilet mınıstrligi Respýblıkalyq notarıattyq palatamen birlesip «Tsıfrlyq notarıat» pılottyq jobasyn iske qosty. Onyń sheńberinde halyqqa senimhattardy onlaın formatta resimdeý múmkindigi berildi. Jobanyń birinshi kezeńinde onlaın formatta senimhattyń tek úsh túri resimdelgen:

- barlyq memlekettik organdarda, mekemelerde, barlyq menshik nysanyndaǵy kásiporyndarda múddeler usynýǵa;

- muragerlik isti júrgizýge;

- sottarda is júrgizýge.

Alaıda, jobany júzege asyrý barysynda turǵyndardyń ómirlik jaǵdaılaryna qaraı onlaın rejımde resimdeletin senimhattar tizbesin keńeıtý qajettiligi týyndady.

Osyǵan baılanysty, Ádilet mınıstrligi múlikke ıelik etýge baılanysty senimhattardan ózge, senimhattardyń barlyq túrlerin osy tizbege engizý týraly sheshim qabyldady.

«Qyzmet alý sapasy men yńǵaılylyǵyn jaqsartý boıynsha jumys jalǵasady»,-dep atap ótti Ádilet vıtse-mınıstri.

Osyǵan deıin QR Prezıdenti notarıat máseleleri boıynsha QR zańyna qol qoıǵany habarlanǵan edi.