Qazaqstanda onlaın-kredıtke tyıym salýǵa petıtsııa jarııalandy
ASTANA. KAZINFORM – «Haq-Nazar» qoǵamdyq qorynyń qyzmetkerleri elimizde onlaın kredıt berýge tyıym salýdy suraıdy. Petıtsııa epetition.kz saıtynda jarııalandy.
Petıtsııa avtorlarynyń pikirinshe, qazaqstandyqtar qarjylyq qyzmetterdi tsıfrlandyrýdyń mundaı túrine áli daıyn emes.
«Onlaın nesıelerdiń ońaı qol jetimdiligi halyqtyń osal toptary arasynda qaryz júktemesiniń ósýine jáne qarjylyq turaqsyzdyqqa ákeledi. Joǵary paıyzdyq mólsherlemeler men ashyq aıqyn emes nesıe sharttary kóbinese adamdardy qaryzǵa batyrady. Qaryz shuńqyryna túsýden bólek, onlaın-nesıe alaıaqtyq, urlyq jáne bopsalaý sııaqty qaryzdy óteý joldarymen baılanysty qylmystardyń kóbeıýine alyp keledi», - delingen habarlamada.
Sondaı-aq, petıtsııa túsindirmesinde áskerı qyzmet jaǵdaıynda onlaın kredıt májbúrleý jáne qarjylyq zorlyq-zombylyq kórsetý quralyna aınalatyny aıtylǵan.
Avtorlar onlaın-kredıtter berýge tyıym salýdy ǵana emes, sonymen qatar mıkrokredıtter berý salasyndaǵy zańnamanyń saqtalýyn baqylaýdy kúsheıtýdi talap etedi.
Keshe jarııalanǵan petıtsııa 6 qyrkúıekke deıin kópshiliktiń talqysyna usynylyp otyr. Qazir petıtsııa 581 qaralym jınady, ázirge eshkim pikir qaldyrmaǵan.
