Qazaqstanda onlaın baqylaý-kassalyq mashınanyń sany qansha
«Onlaın- baqylaý-kassalyq mashınany engizý jáne monıtorıng júıesine qosylý 2015 jyldyń shildesinen bastap kezeń-kezeńimen júzege asyrylady. Onlaın-BKM-dy óz esep aıyrysýlarynda qoldanýǵa mindetti alǵashqy uıymdar – janar-jaǵar maı, dızel, alkogol ónimderin satýshylar boldy. 2016 jyldyń basynan bastap kompıýterlik tehnıka, jıhaz satýshylary, qonaq úıler, kınoteatrlar, shashtarazdar, meıramhanalardyń ıeleri, qurylys materıaldarynyń kóterme satýshylary jańa talaptarǵa sáıkes saýda júrgizip, qyzmet kórsetýge mindetti. 2018 jyldan bastap onlaın-BKM paıdalanýǵa mindettiler tizimi saýda jáne lombardtar salasyndaǵy kásipkerlik sýbektilerimen tolyqtyryldy», - dedi vıtse-mınıstr Úkimet úıinde ótken brıfıngte.
Aıta keteıik, 2019 jyldyń qańtarynan bastap onlaın-BKM qoldanýǵa kóshýdiń sońǵy kezeńi bastaldy. Ashyq saýda oryndaryndaǵy turaqsyz oryn arqyly jumys isteıtin kásipkerler qosyldy. Bul shamamen 15 myń salyq tóleýshi.
«Qazirgi ýaqytta tirkelgen kassalardyń sany 535 myń. Olardyń ishinde onlaın-BKM 505 myń dana. Tirkelgen onlaın-kassalardyń kóp bóligi statsıonarlyq kassalarǵa tıesili, olar shamamen 333 myń nemese 62%, olarǵa tehnıkalyq qyzmet kórsetý ortalyqtarynda qyzmet kórsetiledi. Tirkelgen onlaın-kassalardyń qalǵan 38% kompıýterlerde, planshetterde jáne mobıldi qurylǵylarda jumys isteıtin apparattyq-baǵdarlamalyq keshen (ABK) túrindegi kassalar», - dep naqtylady vıtse-mınıstr.
Mınıstrlik málimetine qaraǵanda, qazir Qazaqstanda qoldanylyp júrgen fıskaldyq jady bar baqylaý-kassalyq mashınalary 1995 jyldan bastap qoldanylyp keledi, olar tehnıkalyq turǵydan eskirgeni anyq. Búgin engizilip otyrǵan onlaın-kassalyq baqylaý mashınalary – bul salyq organdaryna derekterdi onlaın rejiminde tirkeý jáne berý fýktsııasy múmkindigi bar qurylǵylar.
2014 jyly Dúnıejúzilik bank pen salyqtyq ákimshilendirýdi reformalaý jobasy boıynsha birlesken jumys aıasynda halyqaralyq sarapshylardyń usynystaryna sáıkes, onlaın-kassalyq mashınalardy paıdalaný normalary jasalyp, qabyldandy.
