Qazaqstanda onkologııalyq naýqastardy jaǵdaıyna qaraı vaktsınalaý qajet - Dılıara Qaıdarova
NUR-SULTAN. QazAqparat – Onkologııalyq aýrýmen aýyratyn patsıentterdi jaǵdaıyna qaraı vaktsınatsııalaý qajet. Bul týraly «Qazaq onkologııa jáne radıologııa ǵylymı-zertteý ınstıtýty» AQ basqarma tóraıymy Dılıara Qaıdarova aıtty, dep habarlaıdy QazAqparat.
«Onkologııalyq aýrýmen aýyratyn patsıentterdi jaǵdaıyna qaraı vaktsınatsııalaý qajet. Immýnosýpressıvti naýqastarda ımmýnıtet qalyptasýy qıyn bolýy múmkin ekenin eskergen jón», - dedi D.Qaıdarova Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, vaktsına eki ret salynatynyn eskere otyryp, onkolog emdeýdi bastaý nemese jalǵastyrý merzimine qaraı sheshim qabyldaýy kerek. Ásirese, bul em-domdy endi bastaǵan naýqastarǵa qatysty. Sheshim qabyldaý kezinde patsıent úshin qaýipter, jasy, jalpy jaǵdaıy, qandaǵy leıkotsıtter men neıtrofılderdiń deńgeıi, patsıenttiń boljamy baǵalanady.
«Mysaly, tek gormondyq terapııamen aýyratyn naýqastar COVID-19 vaktsınatsııasyna jatpaıdy. Hırýrgııalyq emdeýge jiberiletin patsıentter hırýrgııalyq aralasýǵa deıin nemese odan keıin vaktsınalanady. Qatty isigi bar patsıentter mamandandyrylǵan em bastalǵanǵa deıin 2 apta buryn, tsıtostatıkalyq em qabyldaıtyn patsıentter qajet bolǵan jaǵdaıda em aıaqtalǵannan keıin vaktsınalanady», - dedi ol.
Ol qazirgi ýaqytta onkologııalyq naýqastarda COVID-19 týraly málimetter az ekendigin aıtady.
«Reseıde onkologııalyq naýqastarǵa «Spýtnık V» vaktsınatsııasy boıynsha klınıkalyq zertteýler endi ǵana bastaldy. Qazaqstandyq vaktsına boıynsha derekter joq. Eń bastysy - ár patsıentke jeke kózqaraspen qaraý kerek. Bul rette antıdenelerdiń deńgeıin tekserý qajet emes», - dedi Dılıara Qaıdarova.
