Qazaqstanda onkologııalyq qyzmetti damytý jónindegi jańa baǵdarlama jasalýda
ASTANA. 8 naýryz. QazAqparat - Qazaqstanda onkologııalyq aýrýlardan bolatyn ólim-jitimdi azaıtý jolymen qazaqstandyqtardyń ómir jasyn uzartý maqsatynda onkologııalyq qyzmetti damytý baǵdarlamasyn qabyldaý josparlanýda, dep habarlady pm.kz saıty.
«Áleýmettik-ekonomıkalyq jańǵyrtý - Qazaqstan damýynyń basty baǵytty» atty Qazaqstan halqyna Joldaýynda Elbasy N.Nazarbaev «Qazaqstan Respýblıkasynda onkologııalyq járdemdi damytý týraly» baǵdarlamany iske asyrý jónindegi is-sharalar keshenin atqarý týraly mindet qoıdy.
Úkimetke eki aı merzim ishinde Qazaqstanda, biz júrek-qan tamyrlary aýrýlary máselesi boıynsha jasaǵandaı, Onkologııalyq járdemdi damytý baǵdarlamasyn ázirleýdi tapsyramyn. Sol sııaqty Ulttyq medıtsınalyq holdıng arqaýynda Astanada qýatty Ulttyq ǵylymı onkologııalyq ortalyq qurý máselesin de qarastyrý qajet», dedi Elbasy óz Joldaýynda.
Búgingi tańda «Qazaqstan Respýblıkasynda onkologııalyq járdemdi damytý týraly» salalyq baǵdarlamanyń jobasy ázirlenip otyr. QR Densaýlyq saqtaý mınıstrliginiń habarlaýynsha, bul joba 2012-2016 jyldarǵa eseptelgen jáne ol is-sharalardyń tutas keshenin iske asyrýdy qarastyrady.
«Profılaktıkalyq baǵytty damytýǵa, onyń ishinde skrınıngilik baǵdarlamalardy keńeıtýge úlken mán beriledi. Skrınıngterdiń jańa túrleri: as qorytý júıesi men asqazan qaterli isigi, baýyr qaterli isigi, t.b. skrınıgteri engiziledi», - delingen vedomstvonyń aqparatynda.
Taǵy bir aıta ketetin nárse, Ulttyq medıtsınalyq holdıngtiń bazasynda Ulttyq onkologııalyq ǵylymı ortalyq qurý josparlanýda. Onda qaterli isikti dıagnostıkalaý men emdeýdiń barlyq biregeı álemdik tehnologııalary shoǵyrlanatyn, sondaı-aq ǵylymı-zertteý jumysy júrgiziletin bolady. Holdıngtiń aqparaty boıynsha, qazirgi tańda osynaý ınvestıtsııalyq jobanyń tehnıka-ekonomıkalyq negizdemesi ázirlenýde jáne ony iske asyrý úshin halyqaralyq sarapshylar komıteti jasaqtalýda.
Bul jobanyń aıasynda sondaı-aq onkologııalyq uıymdardy zamanaýı medıtsınalyq jabdyqtarmen qaıta jaraqtaý jáne jańǵyrtý qarastyrylyp otyr, bul shara qazaqstandyqtardyń zamanaýı tehnologııalarǵa qoljetimdiligin qamtamasyz etýge múmkindik beredi. Jáne onkologııalyq kómektiń qoljetimdiligin arttyrý maqsatynda bastapqy medıtsınalyq-sanıtarlyq kómek kórsetý deńgeıinde onkologııalyq, mammologııalyq, proktologııalyq kabınetter ashý, onkologııalyq qyzmet kadrlary men jalpy emdeý jelileri dárigerleriniń biliktilikterin jetildirý sharalary qarastyrylyp otyr.
Bul atalǵan sharalar onkologııalyq kómek kórsetýdiń respýblıka boıynsha ornyqty jáne tıimdi júıesin qurýǵa múmkindik beredi.
