Qazaqstanda onkologııalyq qyzmetti damytý baǵdarlamasy qabyldanady
ASTANA. 7 aqpan. QazAqparat -Qazaqstanda onkologııalyq qyzmetti damytýdyń 2012-2014 jyldarǵa arnalǵan baǵdarlamasy ázirlenýde, dep habarlady Qazaq Onkologııa jáne radıologııa ǵylymı-zertteý ınstıtýtynyń dırektory Qýanysh Nurǵazıev Pm.kz saıtyna bergen arnaıy suhbatynda.
«Elbasynyń Qazaqstan halqyna Joldaýynda qaterli isikterden bolatyn ólim-jitimdi azaıtý jónindegi naqty mindetter qoıyldy. Oǵan qol jetkizý úshin onkologııalyq qyzmetti damytý jáne onkologııalyq naýqastarǵa kórsetiletin medıtsınalyq kómektiń sapasyn jaqsartý jónindegi baǵdarlamany iske asyrý kerek», - dedi Q. Nurǵazıev.
Joldaýda onkologııalyq qyzmetti damytýdyń eki baǵyty eskerilip otyr. Olar: qazirgi onkologııalyq qyzmetti jańǵyrtý jáne «Ulttyq medıtsınalyq holdıngi» AQ-nyń janynan jańa Ulttyq ǵylymı onkologııalyq ortalyq salý baǵyttary.
«Biz salalyq baǵdarlama ázirlep jatyrmyz, ony naýryz aıynyń aıaǵynda Úkimettiń qaraýyna bermekpiz. Salalyq baǵdarlama Densaýlyq saqtaý mınıstrliginiń jumys komıssııasynda talqylandy, túrli medıtsınalyq uıymdar men joǵary oqý oryndarynda talqylanǵannan jáne Qarjy mınıstrligimen kelisilgennen keıin, qujat Úkimettiń qaraýyna beriledi»,- dep atap kórsetti dırektor.
Bul baǵdarlama 2012-2014 jyldar aralyǵynda iske asyrylady. Baǵdarlamalyq qujatta naqty ındıkatorlar jáne baǵdarlamadan kútiletin nátıjeler kórsetiledi.
Q.Nurǵazıevtiń aıtýynsha, Qazaqstan onkologııalyq naýqastarǵa statsıonarlyq jáne ambýlatorlyq deńgeıde tegin em kórsetetin az memlekettiń qatarynda.
