Qazaqstanda onkologııalyq aýrýlardy ınnovatsııalyq emdeý tásiline qoljetimdilik bolmaı tur
ASTANA. QazAqparat - Qazaqstanda onkologııalyq aýrýǵa shaldyqqandar úshin ınnovatsııalyq emdeý tásili qoljetimdi bolmaı tur. Sonyń saldarynan patsıentter sheteldik klınıkalarǵa emdelýge májbúr.
Bul týraly búgin Astanada ótip jatqan onkologııalyq aýrýlardyń aldyn alýǵa arnalǵan halyqaralyq konferentsııada Densaýlyq saqtaý jáne áleýmettik damý mınıstrliginiń ókili Nurlan Qydyrbaev málim etti.
Mınıstrlik ókiliniń atýynsha, Qazaqstandaǵy onkologııalyq aýrýlarǵa qyzmet kórsetýde birqatar qordalanǵan máseleler bar. Máselen, elimizde asa qaterli dertterge shaldyqqan syrqattarǵa, olardyń otbasynyń ómir sapasyn jaqsartýǵa baǵyttalǵan kómekter múldem joqtyń qasy.
«Jalpy, qazirgi tańda obyr aýrýyn emdeý men ony zertteý salasynda ozyq tehnologııalary bar elderdiń qataryna ený úshin halyqaralyq yntymaqtastyq sharalary belsendi júrgizilýde. Bul rette Eýropa onkologtar mektebimen, basqa da jetekshi ortalyqtarmen, Atom energetıkasy jónindegi halyqaralyq agenttik (MAGATE) qarjylandyryp, júzege asyryp jatqan jobalarmen yntymaqtastyq týraly memorandýmdarǵa da qol qoıylýda. Tutastaı alǵanda elimizdegi onkologııalyq aýrýlardy, onyń saldarynan týyndaıtyn ólim-jitimdi tómendetýge 2012-2019 jyldarǵa arnalǵan Onkologııalyq kómekti damytý baǵdarlamasyn júzege asyrý óz septigin tıgizedi. Bul rette baǵdarlama álemdik ozyq tájirıbelerdi qamtı otyryp, onkologııalyq dertterdi erte bastan anyqtaý, reablıtatsııalyq jáne pallatıvtik kómekter júıesin qurý máselesin sheshedi», - dedi N. Qydyrbaev.
