Qazaqstanda onkologııalyq aýrýlardy aldyn alý boıynsha onkúndik jarııalandy
ALMATY. 1 aqpan. QazAqparat /Názıra Eleýhan/ - Dúnıejúzilik obyrǵa qarsy kúres kúni aıasynda Qazaqstannyń barlyq aımaǵynda 1 -10 aqpan aralyǵynda «Onkologııalyq aýrýlardyń aldyn alý» onkúndigi ótedi.
Bul týraly búgin Almatyda «Obyr aýrýynyń aldyn alý jáne erte kezeńinde anyqtaý. Bizdiń kúshimiz birlikte» degen taqyrypta ótken baspasóz máslıhatynda Ulttyq salaýatty ómir saltyn qalyptastyrý ortalyǵynyń dırektory dırektory Jámılá Battaqova málim etti.
Aktsııanyń maqsaty - onkologııalyq aýrýlar máselesine qoǵamnyń nazaryn aýdartý, turǵyndar men medıtsına qyzmetkerlerine jahandyq sıpat alǵan qaterli isik aýrýy túrlerin aldyn alý men erte anyqtaý jóninde aqparattandyrý, el azamatataryna skrınıngtik tekserýdiń qajettiligin túsindirý bolyp tabylady.
"Onkúndik barysynda BAQ arqyly jáne halyq kóp shoǵyrlanǵan jerlerde onkologııalyq aýrýlardyń aldyn alý, ony der kezinde anyqtaý jaıynda aqparattyq sharalar uıymdastyrylatyn bolady. Al, medıtsınalyq mekemelerde mamandar keńesi, ashyq esik kúnderi, turǵyndar úshin skrınıngtik tekserýler ótkiziledi",-dedi J. Battaqova. Onyń aıtýynsha, atalmysh sharalar qalyptasyp otyrǵan onkologııalyq aýrýdyń jartysyna jýyǵyn boldyrmaýǵa yqpal etpek.
Dúnıejúzilik obyrǵa qarsy kúres kúni 2006 jyldyń 4-aqpannan bastap, Obyrǵa qarsy kúres halyqaralyq qoǵamynyń uıymdastyrýymen jáne Dúnıejúzilik Densaýlyq saqtaý uıymynyń qoldaýymen ótkizilip keledi. Bul kúni Qazaqstannyń jáne búkil dúnıejúziniń dárigerleri adamzat balasyna obyr aýrýy jahandyq másele bolyp kele jatqandyǵyn jáne oǵan nazar aýdarý qajettigin eske salady.
