Qazaqstanda onkologııalyq naýqastardyń bes jyldyq ómir súrý kórsetkishi 65%-ǵa jetti
ASTANA.KAZINFORM – Almaty qalasynda QR Densaýlyq saqtaý mınıstri Akmaral Álnazarovanyń qatysýymen Qazaqstan onkologtary men radıologtarynyń X Halyqaralyq sezi ótti. Bul – onkologııa, radıologııa jáne ıadrolyq medıtsına salasyndaǵy óńirdegi eń iri kásibı alańdardyń biri. Bul týraly vedomstvonyń baspasóz qyzmeti málim etti.
Forýmdy Densaýlyq saqtaý mınıstrliginiń qoldaýymen Qazaq onkologııa jáne radıologııa ǵylymı-zertteý ınstıtýty uıymdastyrdy. Іs-shara onkologııalyq aýrýlardyń profılaktıkasy, erte dıagnostıkalaý jáne emdeýdiń zamanaýı tásilderin talqylaýǵa arnaldy.
Sezd jumysyna 1400-den astam maman qatysty, onyń ishinde 470 delegat oflaın formatta qatyssa, 985 sarapshy onlaın rejımde qosyldy. Olardyń qatarynda AQSh, Germanııa, Italııa, Qytaı, Reseı, Túrkııa, sondaı-aq Ortalyq Azııa men Kavkaz elderinen kelgen 150 sheteldik sarapshy bar.
— Qazaqstanda onkologııalyq qyzmetti damytý boıynsha aýqymdy sharalar júıeli túrde júzege asyrylýda: ınfraqurylym jańǵyrtylyp, jańa klınıkalar salynýda jáne joǵary tehnologııalyq jabdyqtar engizilýde. Sońǵy bes jylda onkologııalyq kómekke bólinetin qarjy kólemi úsh eseden astam artty. Bul halyqtyń dıagnostıkaǵa qoljetimdiligin keńeıtýge jáne patsıentterdi zamanaýı targettik jáne ımmýnoonkologııalyq preparattarmen qamtamasyz etýge múmkindik berdi. Sáýlelik jáne protondyq terapııany, ıadrolyq medıtsına tehnologııalaryn jáne jasandy ıntellektti engizýdiń arqasynda onkologııalyq aýrýlardan bolatyn ólim 14%-ǵa tómendedi, al bes jyldyq ómir súrý kórsetkishi 65%-ǵa deıin jetti, — dep atap ótti forýmnyń ashylýynda A. Álnazarova.
Sezdiń ǵylymı baǵdarlamasy sheńberinde derbestendirilgen terapııa máselelerine, joǵary tehnologııalyq hırýrgııalyq ádisterdi engizýge jáne onkologııalyq kómekti uıymdastyrýdy jetildirýge erekshe nazar aýdarylyp otyr.
Sonymen qatar sezd alańynda ókpe obyryn emdeýdiń evolıýtsııasy, sút bezi obyryn emdeýdiń mýltımodaldyq strategııalary, ınterventsııalyq jáne endoskopııalyq tehnologııalardy damytý máselelerine arnalǵan mamandandyrylǵan sektsııalar ótti.
Talqylaýlardyń jeke blogy ıadrolyq medıtsınany damytýǵa jáne emdeý dáldigin arttyrýǵa jańa múmkindikter ashatyn 4D-sáýlelik terapııany engizýge arnaldy.
Memleket basshysynyń tapsyrmasy boıynsha 2023–2027 jyldarǵa arnalǵan onkologııalyq kómekti damytý jónindegi keshendi jospar iske asyrylǵan.
Osy baǵdarlamanyń sheńberinde Astanadaǵy jańa onkoortalyqtyń bazasynda Protondyq terapııa ortalyǵy ashyldy, Qyzylorda jáne Aqtaý qalalarynda eki jańa PET/KT ortalyǵy paıdalanýǵa berildi. Barlyq óńirlerde saraptamalyq endoskopııalyq ortalyqtar ashylyp, ótken jyly onda 15 myńnan astam zertteý júrgizildi.
Jatyr moıny obyry, sút bezi obyry jáne kolorektaldyq obyrdy anyqtaýǵa arnalǵan ulttyq skrınıngtik baǵdarlamalar aýrýlardy erte kezeńde anyqtaý úlesin 34,6%-ǵa deıin arttyrýǵa múmkindik berdi.
Júrgizilgen jumystardyń nátıjesinde bes jyldyq ómir súrý kórsetkishi 16%-ǵa ósti, sáýlelik terapııamen qamtý deńgeıi 13%-ǵa artty, al erte dıagnostıka kórsetkishi 4%-ǵa ulǵaıdy.
Aıta keteıik, elimizde obyrdy erte anyqtaý men emdeý tıimdiligi artyp keledi.
