Qazaqstanda onkologııalyq aýrýdyń aldyn alýǵa arnalǵan qospa ázirlenip jatyr
ASTANA. KAZINFORM — Qazaq qaıta óńdeý jáne taǵam ónerkásibi ǵylymı-zertteý ınstıtýtynyń ǵalymdary otandyq ósimdik shıkizaty negizinde fýnktsıonaldyq maqsattaǵy bıologııalyq belsendi qospalardy óndirýdiń ınnovatsııalyq tehnologııasyn ázirlep jatyr.
Joba joǵary antıoksıdanttyq belsendiligi bar, onkologııalyq jáne júrek-qan tamyry aýrýlarynyń aldyn alýǵa yqpal etetin qoljetimdi ári tıimdi ónimder jasaýǵa baǵyttalǵan.
Ázirlemeniń ózektiligi bıologııalyq belsendi qosylystarmen baıytylǵan fýnktsıonaldyq taǵam ónimderine suranystyń artýymen baılanysty.
BBQ-nyń negizgi quramdas bóligi — aıqyn profılaktıkalyq qasıetterge ıe tabıǵı antıoksıdant lıkopın. Onyń taǵam ratsıonynda jetkiliksiz bolýy ımmýnıtettiń tómendeýine jáne sozylmaly aýrýlar qaýpiniń artýyna áser etýi múmkin.
— Joba aıasynda paıdaly zattardy barynsha saqtaı otyryp, qyzanaq pen qarbyzdan untaq alý tehnologııasy ázirlendi. Qaıta óńdeýdiń zamanaýı ádisterin — lıofıldi jáne ınfraqyzyl keptirýdi qoldaný shıkizattyń túsin, hosh ıisin jáne bıologııalyq qundylyǵyn saqtaýǵa múmkindik beredi.
Alynǵan komponentter negizinde aǵzanyń belsendi zattarǵa táýliktik qajettiligin qamtamasyz etetin BBQ-nyń ońtaıly quramy qalyptastyryldy. Onyń quramyna lıkopın, qyzanaq untaǵy, qarbyz untaǵy, asqabaq dániniń untaǵy jáne maqsary maıy kiredi. Mundaı úılesim joǵary bıojetimdilikti, aıqyn antıoksıdanttyq áserdi jáne jaqsy organoleptıkalyq qasıetterdi qamtamasyz etip, ónimdi turaqty qoldanýǵa yńǵaıly etedi, — delingen AShM habarlamasynda.
Jobanyń praktıkalyq mańyzy — qoljetimdi otandyq shıkizat negizinde fýnktsıonaldyq ónimder óndirý múmkindiginde. Ázirlemeni iske asyrý ımporttyq qospalarǵa táýeldilikti azaıtýǵa, qaıta óńdeý ónerkásibiniń shıkizat bazasyn keńeıtýge jáne agroónerkásiptik keshen úshin qosymsha ósý núktelerin qalyptastyrýǵa múmkindik beredi.
Aıta ketelik qazaqstandyqtarǵa kardıologııa men onkologııadaǵy terapııanyń jańa ádisteri qoljetimdi bolady.
