Qazaqstanda Onkologııa jáne radıologııa ınstıtýty qalaı damyp keledi
ALMATY. QazAqparat – «Qazaqstan onkologııasy. Keshe. Búgin. Erteń» atty halyqaralyq ǵylymı-praktıkalyq konferentsııa barysynda «Qazaq onkologııa jáne radıologııa ǵylymı-zertteý ınstıtýty» AQ basqarma tóraıymy, QR Ulttyq ǵylym akademııasynyń akademıgi, medıtsına ǵylymdarynyń doktory Dılıara Qaıdarova ınstıtýttyń damýy týraly aıtty, dep habarlaıdy QazAqparat tilshisi.
Onyń sózine qaraǵanda, 1959 jylǵa deıin Qazaqstanda qaterli isikti emdeıtin medıtsınalyq mekeme bolmaǵan. Tek alǵash ret 1960 jyly 5 shildede qurylǵan. Ony Sáken Nuǵmanov basqardy.
«1960 jyly munda bir ǵana ǵımarat boldy. Qazir onyń sany 8-ge jetti. Búgingi kúni bul ǵımarattar jańashyldyq pen jańarýdy qajet etedi. Alaıda bizdiń kadrlyq quram myqty. Aldyńǵy qatardaǵylardyń biri desek te bolady. Munda oqyǵan jáne taǵylymdamadan ótken jastar elimizdiń barlyq aımaqtarynda jumys istep jatyr. Olar óńirlerdegi onkologııalyq qyzmet deńgeıin kóteredi. Bizdiń mamandar qazir Amerıka, Ispanııa, Italııada bilim alýda», - deıdi Dılıara Qaıdarova.
Sonymen qatar, ol 2018 jyly emdeý hattamalary ózgertilgenin atap ótti. Olar eýropalyq jáne amerıkalyq onkologtar qaýymdastyǵymen tolyqtaı beıimdelgen. Qazir patsıentter halyqaralyq standarttarǵa sáıkes emdelýde.
«Biz 15 jańa dárini ımmýnoterapııaǵa engizdik. Ár preparattyń baǵasy 500 myńnan 3 mıllıon teńgege deıin. Bul, árıne, memleket úshin úlken salmaq. Biraq memleket emdeýdiń bul túrin tolyqtaı qamtıdy, bizdiń patsıentterdiń ómiri uzarady jáne kóp naýqas aýrýynan aıyǵady», - dep qosty Qaıdarova.
Onyń aıtýynsha, onkologııa - kúrdeli sala. Árbir onkologtyń deńgeıi jyl saıyn joǵarylaıdy. Onkolog bolý úshin shamamen 10 jyl qajet. Sondaı-aq, qazir aǵylshyn tilin bilýge mindetti.
«Biz 2018 jyly jańa dári-dármekter men jabdyqtarǵa memlekettik bıýdjetten qosymsha qarjy alý úshin qaterli isikpen kúresýdiń keshendi josparyn qorǵadyq. Mańǵystaý oblysynda, Pavlodarda jańa onkologııalyq dıspanser ashyldy, Óskemende ashý josparda. Elimizdiń barlyq oblys ortalyqtarynda birtindep ashyp jatyrmyz. Sonymen qatar kadrlar daıyndaımyz»,– dep qortyndylady spıker.
Aıta keteıik, búgin Almatyda «Qazaqstan onkologııasy. Keshe. Búgin. Erteń» atty halyqaralyq konferentsııa bastaldy. Shara eki kúnge sozylady.
