Qazaqstanda ónimin eksportqa shyǵaratyn kásiporyndarǵa qandaı qoldaý kórsetiledi

NUR-SULTAN. QazAqparat – Qazaqstanda otandyq eksporttaýshylarǵa memleket tarapynan qandaı qoldaý kórsetiledi? Bul týraly Saýda jáne ıntegratsııa vıtse-mınıstri Qaırat Tórebaev tolyǵyraq aıtyp berdi, dep habarlaıdy QazAqparat tilshisi.

«Saýda jáne ıntegratsııa mınıstrligi eksporttyq áleýetti arttyrý úshin birshama jospardy bekitti. Atap aıtqanda, ónimin eksportqa shyǵarýdy kózdeıtin kásiporyndarǵa qoldaý kórsetiledi. 2021 jyldan bastap QazTrade shıkizattyq emes taýarlar men qyzmetterdiń eksportyn damytý men saýdalaý jónindegi damý ınstıtýty saqtandyrýdy qospaǵanda, barlyq qyzmetti usynady. Odan bólek bıyl 10 saýda-ekonomıkalyq mıssııa uıymdastyryp, 2 halyqaralyq kórmege (Shanhaı (Qytaı), Expo Dubai (Birikken Arab Ámirlikteri)) qatysý kózdelgen. Onyń qorytyndysy boıynsha 100 myń AQSh dollary somasyna 80 eksporttyq kelisimshartqa qol qoıamyz degen oıdamyz», - dedi vıtse-mınıstr Saýda jáne ıntegratsııa mınıstrliginiń alqa otyrysynda.

Sonymen qatar 2021 jyly eksportty ilgeriletý maqsatynda 130 jańa eksporttaýshy syrtqy naryqqa shyǵýdy kózdep otyr. Onyń elýi Alibaba halyqaralyq elektrondy platformasyna engizilmek.

«KazakhExport quraldary sheńberinde eksporttaýshylarǵa 200 mıllıard teńgege deıin saqtandyrý boıynsha qoldaý kórsetý josparlanyp otyr.

«Ónerkásiptik saıasat týraly» jańa zań sheńberinde otandyq óńdelgen taýarlardy satyp alatyn sheteldik bıznes ókilderine qol kórsetiledi. Odan bólek «Qazaqstan Respýblıkasynyń eksporttyq-nesıelik agenttigi týraly» zań jobasy ázirlenedi. Ol qujat bıyl qabyldanyp úlgerer degen úmittemiz», - dedi ol.