Qazaqstanda ónerkásip óniminiń kólemi 51,9 trln teńgege jetti
ASTANA. KAZINFORM — Bıylǵy qańtar-qyrkúıek aılarynda Qazaqstanda ónerkásip óniminiń kólemi 51,9 trln teńgege jetti. Óńdeý ónerkásibinde 8,6% ósim tirkelip, óndiris kólemi elimizdiń 16 óńirinde artty. Bul týraly Ulttyq statıstıka bıýrosy málim etti.
Bıylǵy jylǵy qańtar-qyrkúıekte Qazaqstanda ónerkásip óndirisiniń ındeksi 102,9%-dy qurady. Ónerkásip óniminiń kólemi 51 935 mlrd teńgege jetti. 2025 jylǵy qańtar-qyrkúıekte bul kórsetkish 44 840,7 mlrd teńgeni quraǵan.
Óńdeý ónerkásibinde oń dınamıka baıqaldy, munda óndiris kólemi 8,6%-ǵa artty. Elektr energııasymen, gazben, býmen, ystyq sýmen jáne aýany kondıtsııalaýmen jabdyqtaý 12,4%-dy, sýmen jabdyqtaý, sýdy burý jáne qaldyqtardy basqarý salasynda 9,2%-dy qurady.
Óńdeý ónerkásibinde mashına men jabdyqtan basqa daıyn metall buıymdaryn óndirý 34,8%-ǵa, negizgi farmatsevtıkalyq ónimder men farmatsevtıkalyq preparattar óndirisi 30,9%-ǵa, hımııa ónerkásibi ónimderin óndirý 23,4%-ǵa ósti. Mashına jasaý ónimderiniń óndirisi 22,8%-ǵa, rezeńke jáne plastmassa buıymdaryn óndirý 18,1%-ǵa, tamaq ónimderin óndirý 13,8%-ǵa, ózge de beımetall mıneraldyq ónimder óndirý 5,9%-ǵa artty.
Ónerkásip óndirisiniń ósýi elimizdiń 16 óńirinde tirkeldi. Eń joǵary ósim Almaty, Jambyl, Jetisý, Soltústik Qazaqstan jáne Túrkistan oblystarynda, sondaı-aq Astana, Almaty jáne Shymkent qalalarynda baıqaldy.
Qazaqstan 7 jylda óndiris salasynda qandaı nátıjege qol jetkizgenin myna siltemeden oqyńyz.
